ASSAM TIMES POST
নগাঁওঃ নগাঁও চহৰৰ মাজেৰে বৈ যোৱা কলং নৈৰ দুয়োপাৰে বিভিন্ন অংশত হোৱা গৰাখহনীয়া প্ৰতিৰোধৰ লগতে কলঙৰ পাৰৰ সৌন্দৰ্য্য বৰ্ধনৰ বাবে নগাঁৱৰ জলসম্পদ বিভাগে শেহতীয়াকৈ প্ৰচেষ্টা হাতত লৈছে । বিভাগটোৱে অসম চৰকাৰৰ ৰাজ্যিক উন্নয়ন শিতান(এছ অ’পি ডি)ৰ অধীনত এই আঁচনি খনৰ কামৰ বাবে ২ কোটি ৩২ লাখ ৫০ হেজাৰ টকা আবন্টন দিছে ।
এই ধন ৰাশিৰে নগাঁও চহৰৰ হয়বৰগাঁৱৰ মাজৰআটি তেলিয়াগাঁও চাৰিআলিৰ সমীপত আঁচনিখন ৰূপায়ণ কৰিব । এছ অ’ পি ডি আঁচনিৰ অধীনত কলঙৰ খহনীয়া প্ৰতিৰোধ আৰু সৌন্দৰ্য্য বৰ্ধনৰ এই আচঁনিখনৰ আজি আধাৰশিলা স্থাপন কৰে নগাঁও সদৰ সমষ্টিৰ বিধায়ক ৰূপক শৰ্মাই। আধাৰশিলা স্থাপন অনুষ্ঠানত নগাঁও জলসম্পদ সংমণ্ডলৰ কাৰ্যবাহী অভিযন্তা ভাস্কৰ জ্যোতি দাস, সহকাৰী কাৰ্যবাহী অভিযন্তা সুৰজিৎ ভৰালী আৰু প্ৰবীণ শইকীয়াকে ধৰি কেইবাজনো বিশিষ্ট ব্যক্তি উপস্থিত থাকে।
আঁচনি খনৰ আধাৰশিলা স্থাপন কৰি বিধায়ক শৰ্মাই কয় যে নগাঁও চহৰৰ উন্নয়ন আৰু সৌন্দৰ্য বৰ্ধনৰ বাবে কেতবোৰ আঁচনি গ্ৰহণ কৰা হৈছে। ইতিমধ্যে চহৰখনৰ তিনি শতাধিক পথ পকীকৰণ কৰা হৈছে।তাৰোপৰি, চহৰখনৰ মাজেৰে বৈ যোৱা কলং নৈৰ সৌন্দৰ্য বৰ্ধনৰ বাবেও আমি পদক্ষেপ গ্ৰহণ কৰিছো। চহৰখনৰ আইন মহাবিদ্যালয়ৰ সমীপৰ দলং খনৰ পৰা ৰত্নকান্ত বৰকাকতী দলং পৰ্যন্ত কলং নৈৰ পাৰত পদপথ নিৰ্মাণ কৰা হ’ব, যাতে ৰাইজে পুৱা-গধূলি এই পদপথেৰে কলঙৰ পাৰত খোজ কাঢ়িব পাৰে। বিধায়ক শৰ্মাই আৰু কয় যে কলং হৈছে নগঞা ৰাইজৰ আয়ুস ৰেখা স্বৰূপ। এই কলং খন বোৱাই নিয়াত আমাৰ চৰকাৰে প্ৰচেষ্টা হাতত লৈছে। আমিও কলং নৈৰ সৌন্দৰ্য বৰ্ধনৰ বাবে পদক্ষেপ লৈছোঁ।
