সংৰক্ষিত বনাঞ্চলৰ ভূমি অখিলঞ্জীয়া লোকে বসবাসৰ বাবে বিচৰাৰ উপৰি এই ভূমিত মাটি প্রদান কৰাক কেন্দ্র কৰি বিগত তিনিদিন ধৰি উত্তাল হৈ থকা দুয়োখন পার্বত্য জিলাৰ পৰিস্থিতি কিছু শাম কাটিছে যদিও দুয়োখন পার্বত্য জিলাজুৰি আজিও অব্যাহত আছে চেপা উত্তেজনা। বিগত দুদিন ধৰি সম্পূর্ণৰূপে বন্ধ হৈ থকা কার্বি আংলং জিলা সদৰ ডিফুত আজি পুরা দোকান-পোহাৰ খোল খাই আৰু অট’সমূহ ৰাজপথত চলা পৰিলক্ষিত হয়।
ডিফু চহৰৰ পৰিস্থিতি সামান্য হোৱা পৰিলক্ষিত হয় যদি ও জিলাখনৰ বিভিন্ন প্রান্তত এতিয়াও বন্ধ হৈ থকাৰ বাতৰি লাভ কৰা গৈছে। জিলা প্রশাসন আৰু আৰক্ষী প্রশাসনে আজি বিভিন্ন দল-সংগঠনৰ সৈতে বহু বৈঠক অনুষ্ঠিত কৰে। মূলতঃ শান্ত কৰি তোলাৰ বাবেই এই আলোচনাসমূহ অনুষ্ঠিত কৰা হয়। ইয়াৰোপৰি বিভিন্ন দল-সংগঠনেও কেবাখনো সুকীয়া সংবাদমেল অনুষ্ঠিত কৰি নিজৰ নিজৰ স্থিতি প্রকাশ কৰে। পশ্চিম কাবি আংলঙৰ খেৰণিত ১৫ ফেব্রুৱাৰীত বিহাৰী সম্প্রদায়ৰ একাংশ যুবকে কাৰবি ছাত্র সন্থা আৰু আঞ্চলিক ৰাজনৈতিক দল এএছডিচি যুৱ মৰ্চাৰ এটা প্রতিবাদকাৰী দলক আক্রমণ কৰাক লৈ হোৱা প্রতিবাদৰ পাছত ডিফু চহৰলৈ স্বাভাবিক জীৱন যাত্রা প্রায় ঘূৰু অহা পৰিলক্ষিত হৈছে।
আজি এপিএইচএলচি দলৰ যুব মর্চাৰ নেতৃত্বই এখন সংবাদমেল সম্বোধন কৰা এই ঘটনাক তীব্ৰ নিন্দা কৰাৰ লগতে স্থানীয় এমএচি পৱন কুমাৰ আৰু স্থানীয় বিধায়ক ৰূপছিং টেৰণক কঠোৰ সমালোচনা কৰে। সংবাদমেলত যুব সংগঠনটোৰ নেতৃত্বই কয় যে, ইমান ভাঙৰ ঘটনা সংঘটিত হৈ যোবাৰ পাছতে। দুয়োগৰাকী জনপ্রতিনিধি জনতাৰ কাষলৈ নাহিল। তেওঁলোক বিহাৰী সম্প্ৰদায়ৰ সংগঠন আৰএনএছএচৰ লগত জড়িত নেকি বুলি সংগঠনটোরে প্রশ্ন উত্থাপন করে। লগতে ছাত্র সংগঠনাটোৱে এমএচি পৱন কুমাৰ ৰায়ৰ পদত্যাগ দাবী কৰে।
আনহাতে পাহাৰৰ আঞ্চলিক দল এএছডিচিয়ে এখন সংবাদমেলৰ জৰিয়তে খেৰণিত সংঘটিত ঘটনাৰ বাবে সামাজিক মাধ্যমত প্রচাৰ হোৱা সংবাদৰ ক্ষেত্ৰত তীব্র অসন্তুষ্টি প্রকাশ কৰি সামাজিক মাধ্যমক নিয়ন্ত্রণ কৰাৰ আহ্বান জনাই দুয়োখন জিলা প্রশাসনৰ ওচৰত। দলটোৰ সভাপতি তথা প্রাক্তন বিধায়ক চন্দ্রকান্ত তেৰাঙে কয় যে, আমি স্বায়ত্ত শাসিত ৰাজ্যৰ দাবীত আন্দোলন চলাই আহিছো। আমাৰ দলৰ ভাতৃ সংগঠনৰ যুব মৰ্চা আৰু কাৰবি ছাত্র সন্থাই ভিজিআৰ আৰু পিজিআৰত বসবাস কৰা লোক সকলক উচ্ছেদিত কৰাৰ দাবীত আন্দোলন কৰি ঘূৰি অহাৰ সময়ত বিহাৰী সম্প্রদায়ৰ লোকে তেওঁলোকক আক্রমণ কৰিছিল।
গ্রেজিং মাটিত বসবাস কৰাটো অনিয়ম। তেওঁলোকৰ যিদৰে মাটিৰ পট্টা বিচৰাৰ অধিকাৰ আছে তেনেদৰে আমাৰো ইয়াৰ প্রতিবাদ কৰাৰ অধিকাৰ আছে। কিন্তু ইয়াৰ বাবে আইন হাতত তুলি লোৱাটো অসাংবিধানিক কথা। এই ঘটনাৰ আলম লৈ একাংশ লোকে ইয়াক সাম্প্রদায়িক ৰূপ দিয়াৰ চেষ্টা চলোৱা পৰিলক্ষিত হোৱা বুলিও তেওঁ অভিযোগ কৰে ৷ আনহাতে, কার্বি আংলং স্বায়ত্ত শাসিত পৰিষদে এএছডিচি আৰু ভাতৃ সংগঠনসমূহক ১৯ ফেব্রুৱাৰীত আলোচনাৰ বাবে কৰা আমন্ত্রণ তেওঁলোকে গ্রহণ কৰা বুলি উল্লেখ কৰি অহা ২০ ফেব্ৰুৱাৰীত তুলিৰাম ৰংহাঙে আহ্বান জনোৱা সৰ্বদলীয় সভাতো উপস্থিত থাকিব বুলি কয় ৷
আনহাতে ২৬ তাৰিখে স্বায়ত্তৰাজ্যৰ দাবীলৈ ডিফুত এএছডিচিৰ গণ বিক্ষোভ কাৰ্যসূচী অনুষ্ঠিত হব বুলি জনায় নেতা গৰাকীয়ে । উল্লেখনীয় যে জিলাখনৰ বিভিন্ন প্রান্তৰ পৰা উৰা বাতৰি প্রকাশ পাই থকালৈ চাই প্রশাসন অধিক সষ্টম হোৱাৰ প্রয়োজন আছে বুলি স্থানীয় জনতাই মতপোষণ কৰিছে।
