জম্মু-শ্ৰীনগৰ (Jammu-Srinagar) ৰাষ্ট্ৰীয় ঘাইপথত পুনৰ ভূমিস্খলনৰ ঘটনা সংঘটিত হৈছে। এফালে প্ৰচণ্ড বৰষুণ, আনফালে বৰফ। ইফালে বুধবাৰে চন্দৰকোট-বনিহালৰ মাজৰ ঘাইপথটো ভাঙি পৰে। ৰামবন জিলাৰ জম্মু-শ্ৰীনগৰ ৰাষ্ট্ৰীয় ঘাইপথত ভূমিস্খলন হয়। যাৰ বাবে এশৰো অধিক যাত্ৰীবাহী গাড়ী আবদ্ধ হৈ আছে।
প্ৰশাসনৰ সূত্ৰ অনুসৰি, সোমবাৰৰ পৰা ৰামবন জিলাত ধাৰাসাৰ বৰষুণ হৈ আছে। বৰষুণৰ বাবে জিলাখনৰ বহু ঠাইত ভূমিস্খলন সংঘটিত হয়। বহু পৰ্যটকৰ ক্ষতি হয়। সোমবাৰেও বন্ধ থাকে ৰাষ্ট্ৰীয় ঘাইপথ। বুধবাৰে ভাঙি পৰাৰ পিছত পুনৰ বন্ধ কৰি দিয়া হয়।
আৰক্ষীৰ সূত্ৰ অনুসৰি, বিগত তিনিদিন ধৰি ৰাষ্ট্ৰীয় ঘাইপথত যান-জঁটৰ সৃষ্টি হৈছে। একেৰাহে ভূমিস্খলন হোৱাৰ বাবে বহু গাড়ী আবদ্ধ হৈ পৰিছে। ৰাষ্ট্ৰীয় ঘাইপথত হোৱা ভূমিস্খলনৰ ধ্বংসাৱশেষ ক্ষিপ্ৰতাৰে আঁতৰোৱাৰ প্ৰচেষ্টা চলোৱা হৈছে। বৰফ পৰাৰ বাবে কামত বাধা আহি পৰিছে। তুষাৰপাতৰ বাবে শ্ৰীনগৰ-লাডাখ পথো বন্ধ হৈ আছে। ইফালে বতৰ বিজ্ঞান বিভাগে কাশ্মীৰৰ উচ্চ অঞ্চলত হিমস্খলনৰ সতৰ্কবাণী জাৰি কৰিছে।
