সমাগত লোকসভা নিৰ্বাচন। নিৰ্বাচনৰ বাবে শাসনাধিষ্ঠিত বিজেপিয়ে ব্যাপক পৰিকল্পনাৰে আগবাঢ়িছে। লগতে কোনো বিসম্বাদ অবিহনে প্ৰকাশ কৰিছে প্ৰাৰ্থী তালিকা। কিন্তু ইয়াৰ বিপৰীতে বিৰোধী কংগ্ৰেছৰ ভিতৰ চ’ৰাত অব্যাহত আছে বিসম্বাদ আৰু দলত্যাগ। যাৰ বাবে দলটোৱে এতিয়াও নিৰ্বাচনৰ প্ৰচাৰৰ বাবে সম্পূৰ্ণভাৱে সংগঠিত হ’ব পৰা নাই।
বিশেষকৈ অসম প্ৰদেশ কংগ্ৰেছত চলি থকা মুকলি সংঘাত তীব্ৰ হৈ পৰিছে। এজন এজনকৈ দলীয় নেতাই কংগ্ৰেছ ত্যাগ (Quit Congress) কৰাৰ পিছত এইবাৰ দলত্যাগ কৰিলে আন এগৰাকী জ্যেষ্ঠ নেতা তথা বৰ্তমান বৰপেটা লোকসভা সমষ্টিৰ সাংসদ আব্দুল খালেকে (Congress leader Abdul Khaleque)। নিৰ্বাচনত দলীয় টিকট নোপোৱাৰ পিছতে তেওঁ পদত্যাগ কৰে।
ইতিমধ্যে তেওঁৰ পদত্যাগ পত্ৰ ৰাষ্ট্ৰীয় সভাপতি মল্লিকাৰ্জুন খাৰ্গেলৈ প্ৰেৰণ (Resignation letter sent to President Mallikarjun Kharge) কৰিছে। অৱশ্যে তেওঁ পদত্যাগ পত্ৰত প্ৰদেশ কংগ্ৰেছৰ সভাপতি ভূপেন বৰা আৰু অসমৰ তত্বাৱধায়ক জীতেন্দ্ৰ সিঙৰ বিৰুদ্ধে অভিযোগ আনে।
আনহাতে, আন এক ঘটনাক্ৰমত শুকুৰবাৰে আম আদমী পাৰ্টীয়ে (Aam Aadmi Party) গুৱাহাটী লোকসভা সমষ্টিৰ প্ৰাৰ্থীত্ব প্ৰত্যাহাৰ (Guwahati Lok Sabha candidate withdrawn) কৰে। আপে এক সংবাদ মেলযোগে এই কথা সদৰী কৰে। আগন্তুক নিৰ্বাচনত বিজেপি বিৰোধী প্ৰাৰ্থীৰ বিজয় সুনিশ্চিত কৰিবলৈ আপৰ প্ৰাৰ্থী ভবেন চৌধুৰীয়ে নিৰ্বাচনত প্ৰতিদ্বন্দিতা নকৰাৰ কথা ঘোষণা কৰে। ইয়াৰ বিপৰীতে দলটোৱে কংগ্ৰেছ প্ৰাৰ্থী মীৰা বৰঠাকুৰক সমৰ্থন জনোৱাৰ কথা ঘোষণা কৰে।
