কাৰ্বি আংলঙৰ ডিফুত অনুষ্ঠিত হৈছে কাৰ্বি ধৰ্মীয় পুৰোহিতসকলৰ অনুষ্ঠান ‘কাৰ্বি কুৰুছাৰ চিংৰুম আমেই’ৰ অষ্টম প্ৰতিষ্ঠা দিৱস। এই দিৱসত অংশগ্ৰহণ কৰি ৰাজ্য চৰকাৰৰ থলুৱা আৰু জনজাতীয় বিশ্বাস আৰু সংস্কৃতি বিভাগৰ মন্ত্ৰী বিশ্বজিৎ দৈমাৰীয়ে কয়, “ভাৰতীয় সভ্যতা-সংস্কৃতি মানেই ঈশ্বৰৰ প্ৰতি থকা বিশ্বাস আৰু ঈশ্বৰৰ উপাসনা। নিয়ম-নীতিৰ জৰিয়তে কৰি অহা ঈশ্বৰৰ আৰাধনাই ভাৰতীয় সামাজিক পৰম্পৰা আৰু ৰীতি-নীতি নিৰ্ধাৰণ কৰি আহিছে।”
তেওঁ লগতে কয় যে বেদ, উপনিষদ বা পুৰাণত জনজাতীয় পৰম্পৰা তথা দেৱ-দেৱীৰ কথা উল্লেখ নাই যদিও জনজাতীয়সকলে নিজস্ব পৰম্পৰাৰে ভগৱানৰ আৰাধনা কৰি আহিছে।
আনহাতে, কাৰ্বি পুৰোহিতসকলেও পূৰ্বৰে পৰা নিজস্ব ধৰ্মীয় ৰীতি-নীতি আৰু বিশ্বাস বজাই ৰাখি কাৰ্বি জনগোষ্ঠীৰ সামাজিক নিয়ম-নীতিক পৰিচালিত কৰি আহিছে বুলি অসম বিধানসভাৰ প্ৰাক্তন অধ্যক্ষগৰাকীয়ে উল্লেখ কৰে। লগতে তেওঁৰ বিভাগটোৱে কাৰ্বি পুৰোহিতসকলৰ কল্যাণৰ বাবে কাম কৰি যাব বুলিও কয়।
ডিফুৰ চৰকাৰী উচ্চতৰ মাধ্যমিক বিদ্যালয় খেলপথাৰত অনুষ্ঠিত কাৰ্বি পুৰোহিতসকলৰ এই অনুষ্ঠানত কাৰ্বি আংলঙ স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙেও অংশগ্ৰহণ কৰে। অনুষ্ঠানত কাৰ্বি পৰম্পৰাগত ৰজা লংছিং ৰংহাঙৰ লগতে কাৰ্বি আংলং আৰু পশ্চিম কাৰ্বি আংলঙৰ সহস্ৰাধিক পুৰোহিত উপস্থিত থাকে।
