পৰ্ণ তাৰকা ষ্টৰ্মি ডেনিয়েলছক (Porn star Stormy Daniels) উৎকোচ দিয়াৰ গোচৰত (Bribery case) আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ (Former President Donald Trump) বিচাৰ ১৫ এপ্ৰিলৰ পৰা আৰম্ভ হ’ব। ট্ৰাম্পৰ বিৰুদ্ধে চাৰিটা অপৰাধমূলক গোচৰ ৰুজু হৈছে। অৱশ্যে নৱেম্বৰৰ ৰাষ্ট্ৰপতি নিৰ্বাচনৰ পূৰ্বে একমাত্ৰ এই গোচৰত ৰিপাব্লিকান প্ৰাৰ্থীজনে আদালতত হাজিৰ হোৱাৰ সম্ভাৱনা আছে। কিন্তু ট্ৰাম্পে তেওঁৰ বিৰুদ্ধে উত্থাপিত ৩৪টা অভিযোগৰ সকলোবোৰেই অস্বীকাৰ কৰিছে।
প্ৰাক্তন ৰাষ্ট্ৰপতিগৰাকীয়ে যুক্তি দিছে যে তেওঁৰ বিৰুদ্ধে উত্থাপিত অভিযোগ অপৰাধৰ সমান নহয়। ট্ৰাম্পে কয়, “এয়া যথেষ্ট অপমানজনক। মই এই ৰায়ৰ বিৰুদ্ধে আপীল কৰিম।” ২০১৬ চনৰ ৰাষ্ট্ৰপতি নিৰ্বাচনৰ সময়ত প্ৰাক্তন পৰ্ণ তাৰকা ষ্টৰ্মি ডেনিয়েলছক তেওঁৰ সৈতে সম্পৰ্কৰ বিষয়ে মুকলিকৈ নক’বলৈ বৃহৎ উৎকোচ দিয়াৰ অভিযোগ উত্থাপন হৈছে ট্ৰাম্পৰ বিৰুদ্ধে। ইফালে আন এটা জালিয়াতিৰ গোচৰত নিউয়ৰ্কৰ এখন আদালতে শেষ মুহূৰ্তত ট্ৰাম্পৰ বণ্ডৰ পৰিমাণ ৪৬৪ মিলিয়ন ডলাৰৰ পৰা ১৭৫ মিলিয়ন ডলাৰলৈ হ্ৰাস কৰে। এই বণ্ডৰ ধন জমা কৰিবলৈ তেওঁক ১০ দিনৰ সময় দিয়া হৈছে।
