ষ্টাফ ৰিপ’ৰ্টাৰ,ডিফু: দুদিনীয়া চৰকাৰী কাৰ্যসুচী লৈ পশ্চিম কাৰ্বি আংলং জিলাৰ বৈঠালাংছ আৰু ডংকামোকামত পৃথকে-পৃথকে কাৰ্বি আংলং স্বাযত্ব পৰিষদে “পুৰ্থিমী আকেমাং” নামাকৰণেৰে এক চৰকাৰী অভিলাষী কাৰ্যসুচী লৈ মাটিৰ পট্টা বিতৰণ কৰে ৷
জিলা খনৰ নৱ গঠিত অসম বিধান সভাৰ ১১১ নং ৰংখাং বিধান সভা সমষ্টি আৰু ১১২ নং আমৰি বিধান সভা সমষ্টিৰ অধীনস্থ বৈঠালাংছৰ চেৰদিহুন আক্লামত কালি চৰকাৰী ভাৱে মাটিৰ পট্টা বিতৰণৰ আনুষ্ঠানিক শুভাৰম্ভৰ পাচত আজি ডংকমোকামস্থিত ৱাইচং খেল পথাৰত কাৰ্বি আংলং স্বাযত্ব পৰিষদে দ্বিতীয়তো ধাৰাবাহিক চৰকাৰী অভিলাষী কাৰ্যসুচী লৈ চৰকাৰী ভাৱে মাটিৰ পট্ৰা বিতৰণ কৰে ৷
ইপিনে, আমৰি বিধান সভা সমষ্টিৰ বৈঠালাংছৰ চেৰদিহুন আক্লামত কালি পোন্ধৰ হাজাৰ লোকক বিনামূলীয়া ভাৱে কাৰ্বি আংলং স্বাযত্ব পৰিষদৰ মুখ্য কাৰ্যবাহী সদস্য ড° তুলিৰাম ৰংহাঙে মাটিৰ পট্টা বিতৰণ কৰে ৷ আজি ডংকামোকাম ৱাইচং খেল পথাৰত প্ৰায় ২০ হাজাৰ পৰিয়ালক সামৰি কাৰ্বি আংলং স্বাযত্ব পৰিষদৰ মুখ্য কাৰ্যবাহী সদস্য ড° তুলিৰাম ৰংহাঙৰ নেতৃত্বত চৰকাৰী ভাৱে বিনামূলীয়া কৈ মাটিৰ পট্টা বিতৰণ কৰে ৷
“পুৰ্থিমী আকেমাং” নামৰ চৰকাৰী অভিলাষী কাৰ্যসুচীত আজি ডংকামোকাম ৱাইচং খেল পথাৰত মুখ্য অতিথি ৰূপে উপস্থিত থাকি মুখ্য কাৰ্যবাহী ড° তুলিৰাম ৰংহাঙে ভাষণ প্ৰসংগত দুই পাহাৰীয়া জিলাৰ এক লাখ পৰিয়ালক সামৰি চৰকাৰী ভাৱে চলিত বিত্তীয় বৰ্ষৰ ভিতৰত কাৰ্বি আংলং স্বাযত্ব পৰিষদে বিনামূলীয়া কৈ মাটিৰ পট্টা প্ৰদান কৰিব বুলি আজিৰ ৰাজহুৱা সভাত আশ্বাস দিয়ে ৷
লগতে বিৰোধীৰ অপপ্ৰচাৰত ভুল নাযাবলৈ ও ৰাইজক আহ্বান জনায় ড° ৰংহাঙে ৷ চৰকাৰী ভাৱে আযোজিত “পৰ্থিমী আকেমাং”কাৰ্যসুচীত ৬ নং ডিফু লোকসভা সমষ্টি সাংসদ অমৰ ছিং টিচ্চ, বিধায়কদ্বয় ক্ৰমে ৰূপছিং টেৰণ, দৰছিং ৰংহাং, কাৰ্বি পৰিষদৰ অধ্যক্ষ ৰাজু টিচ্চ, কাৰ্বি জনগোষ্ঠীয় পৰম্পৰা ৰজা লংছিং ৰংহাং, পৰিষদৰ কাৰ্যবাহী সদস্য-সদস্যা প্ৰমুখ্যে হামৰেণ জিলা আয়ুক্ত সুৰংগা পানী শৰ্মা, হামৰেণ জিলা আৰক্ষী অধীক্ষক ইন্দ্ৰনীল বৰুৱা আৰু কাৰ্বি পৰিষদৰ ভুমি বিভাগৰ সচিব সহ পৰিষদৰ বিভিন্ন বিভাগৰ সচিব দ্বয় উপস্থিত থাকে ৷
