পাহাৰীয়া জিলা কাৰ্বি আংলঙৰ মাজেৰে যোৱা ৩৬নং আৰু ৩৯নং ৰাষ্ট্ৰীয় ঘাইপথ দুটা ক একাংশ অসাধু বেপাৰীয়ে কৰিডৰ হিচাপে ব্যৱহাৰ কবি বর্তমানেও গোপনে বার্মিজ চুপাৰি (Burmese Supari)ৰ অবৈধ সৰবৰাহ (Illegal trafficking) অব্যাহত ৰাখিছে। এই কথাৰ সত্যতা পুনৰ প্ৰমাণ কৰিছে আজি বোকাজান মহকুমাৰ অধীনৰ ডিলাই আৰক্ষীৰ নিয়মীয়া নাকাত জব্দ হোৱা বৃহৎ পৰিমাণৰ বার্মিজ চুপাৰিয়ে।
ইয়াৰ উপৰি এই বার্মিজ চুপাৰিৰ লগতে আৰক্ষীয়ে কেইবালক্ষাধিক টকাৰ ড্রাগছো জব্দ কৰে। আৰক্ষী সূত্রে পোৱা তথ্য অনুসৰি আজি ডিলাই আৰক্ষীৰ নিয়মীয়া নাকাত এএছ-৩১-চি-১০৭৭ নম্বৰৰ এখন বলেৰ’ পিক আপ বাহন ৰখাই-তালাচী চলাওঁতেই গাড়ীখনৰ পৰা ২৪টা বস্তাত মুঠ ২৩ কুইণ্টল বার্মিজ চুপাৰি উদ্ধাৰ কৰে। আজি আৰক্ষীয়ে জব্দ কৰা ড্রাগছখিনিৰ লগতে এটা সৰবৰাহকাৰী আটক কৰে। ধৃত বার্মিজ চুপাৰি সৰবৰাহকাৰীটো হৈছে ডবকাৰ নাজিৰ হুছেইন।
আজি ডিলাই আৰক্ষী (Dillai police)য়ে জব্দ কৰা বার্মিজ চুপাৰিখিনিৰ বজাৰ মূল্য প্রায় ১১ লাখ টকা হ’ব বুলি আৰক্ষী সূত্রে জানিব পৰা গৈছে। আনহাতে, আজি একেদিনাই ডিলাই আৰক্ষীয়ে এনএল-০৭- এএ-৩৭৭৮ নম্বৰ আন এখন বালি কঢ়িওৱা ডাম্পাৰ গাড়ীৰ পৰা ডিলাই আৰক্ষীৰ তালাচীত আৰক্ষীৰ এটা দলে ডবকাৰ জাকিৰ হুছেইন, খাইৰুল ইছলাম আৰু ফাৰুক আহমেদৰ পৰা তিনিটাকৈ চাবোনৰ বাকচত লুকুৱাই অনা অৱস্থাত ৩৫.৯৫ গ্রাম ড্রাগছ জব্দ (Drugs seized) কৰিবলৈ সক্ষম হয়। আজি আৰক্ষীয়ে জব্দ কৰা নিষিদ্ধ ড্রাগছখিনিৰ বজাৰ মূল্য ৩ লক্ষাধিকৰো অধিক হ’ব বুলি আৰক্ষী সূত্রে জানিব পৰা গৈছে।
