শণিবাৰে বিয়লি ডিফুত শান্তি চুক্তি স্বাক্ষৰকাৰী ৬ বিদ্ৰোহী সংগঠনৰ ঐক্য মঞ্চই এক সংবাদমেলৰ আয়োজন কৰে ৷ ২০২১ চনৰ ৪ ছেপ্টেম্বৰত নতুন দিল্লীত শান্তি চুক্তি স্বাক্ষৰ কৰা ৬ বিদ্রোহী সংগঠনে শান্তি চুক্তিৰ জৰিয়তে অনা ৫০০ কোটি টকা বিনিয়োগ হোৱা বুলি বিৰোধী ৰাজনৈতিক দল এপিএইচএলচি দলে অভিযোগ আজি খণ্ডন কৰে ৬টা বিদ্রোহী সংগঠনৰ ঐক্যমঞ্চই।
সম্প্ৰতি অসমৰ ৰাজনীতি তোলপাৰ কৰি ৰখা কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ নির্মীয়মান অট্টালিকাই দৈনিক সংবাদ শিৰোনাম দখল কৰি আছে। তুলিৰাম ৰংহাঙৰ এই প্রসাদোপম অট্টালিকা নির্মাণত ২০২১ চনৰ ৪ ছেপ্টেম্বৰত নতুন দিল্লীত শান্তি চুক্তি স্বাক্ষৰ কৰা ৬ বিদ্রোহী সংগঠনে শান্তি চুক্তিৰ জৰিয়তে অনা ৫০০ কোটি টকা বিনিয়োগ হোৱা বুলি বিৰোধী ৰাজনৈতিক দল এপিএইচএলচি দলে অভিযোগ আজি খণ্ডন কৰে ৬টা বিদ্রোহী সংগঠনৰ ঐক্যমঞ্চই। ডিফুত এখন সংবাদমেল সম্বোধন কৰি বিদ্রোহী সংগঠন কেএলএনএলএফৰ প্ৰাক্তন শীর্ষ নেতা ৰেজাক ডেৰাই সংবাদমাধ্যমত প্রকাশ পোৱা এই তথ্য সম্পূর্ণ ভিত্তিহীন আখ্যা দিয়ে।
তুলিৰামৰ পুত্ৰই সজা ঘৰৰ লগত বিদ্রোহী সংগঠনৰ শান্তি চুক্তিৰ ধনৰ কোনো লেনদেন নাই। এয়া দলটোৰ ভুৱা অপপ্রচাৰ আখ্যা দিয়ে। শান্তি চুক্তিৰ জৰিয়তে কেন্দ্ৰীয় চৰকাৰৰ ৫০০ কোটি আৰু ৰাজ্য চৰকাৰৰ ৫০০ কোটি টকা পাৰ্বত্য জিলা দুখনৰ উন্নয়নৰ বাবে ধার্য কৰা হৈছে যদিও এতিয়ালৈকে চুক্তিৰ আধাৰত ইতিমধ্যে দুখনহে আঁচনি ৰূপায়ণ হৈ আছে। ডিফুৰ মুখ্য ডাকঘৰৰ পৰা অসম বিশ্ববিদ্যালয় ডিফু চৌহদলৈকে চাৰিলেনযুক্ত পথ নিৰ্মাণ আৰু হামৰেণৰ আন্তঃহামৰেণ পথ নির্মাণ চলি আছে এই আঁচনিৰ জৰিয়তে। কেন্দ্রীয় চৰকাৰৰ ৫০০ কোটিৰ অন্তর্ভুক্ত এই দুই আঁচনি।
ৰাজ্য চৰকাৰে এতিয়ালৈকে নিজৰ ৫০০ কোটি টকাৰ এটকাও মুকলি কৰি দিয়া নাই বুলি ডেৰাই উল্লেখ কৰে। ১০৬ কোটি টকা ব্যয় সাপেক্ষে ডিফুৰ পৰা বিশ্ববিদ্যালয় চৌহদলৈ পথ নির্মাণৰ কাম ৫৫ শতাংশ সম্পূর্ণ হৈছে। ইয়াৰ বাবে ঠিকাদাৰী প্রতিষ্ঠানক ৪৮ কোটি টকা পৰিষদে প্রদান কৰিছে। হামৰেণৰ পথ যোগাযোগৰ বাবে ৬৬ কোটি টকা ধার্য কৰা বুলি উল্লেখ কৰি ৭১ শতাংশ কামৰ অগ্রগতি হোৱা বুলি প্রকাশ কৰি ৩১ কোটি টকা পৰিষদে পুঁজি মুকলি কৰি দিয়া বুলি ডেৰাই জানিবলৈ দিয়ে। এতিয়ালৈকে দুয়োখন আঁচনিৰ বাবে ৭১ কোটি টকা মুকলি কৰি দিয়া হৈছে বুলি ডেৰাই জানিবলৈ দি কয় যে শান্তি চুক্তিব ধন এতিয়ালৈকে ইমানেই আবণ্টিত হৈছে।
সেয়েহে এই অভিযোগ ভিত্তিহীন। বিদ্রোহী সংগঠন কেইটাই ৰাজনৈতিক মুনাফাৰ বাবে কার্বি শান্তি চুক্তিক সাঙুৰি নল’বলৈ এপিএইচএলচি দলক সকিয়াই দিয়ে। কার্বিশান্তি চুক্তিৰ জৰিয়তে কিমান পুঁজি আহিছে আৰু উন্নয়নমূলক আঁচনি সন্দর্ভত কিবা জানিব লগা থাকিলে সংগঠন কেইটাৰ কাষ চাপিবলৈ আহ্বান জনায়। দলটোক কার্বি শান্তি চুক্তিৰ পৰিপন্থী আখ্যা দি দলটোৱে সান্তি চুক্তিৰ বহু কেইখন আঁচনিৰ বিৰোধিতা কৰা বুলিও ডেৰাই সংবাদমাধ্যমৰ আগত জানিবলৈ দিয়ে। কার্বিশান্তি চুক্তিৰ অগ্রগতি সন্দৰ্ভত সন্তুষ্ট নে বুলি কৰা প্ৰশ্নৰ উত্তৰত ডেৰাই সন্তুষ্ট বুলি প্রকাশ কৰি ইতিমধ্যে ডনাৰ মন্ত্রণালয়ে বহু কেইখন আঁচনিৰ ডিপিআৰ মঞ্জুৰ কৰা বুলিও সদৰি কৰে।
আনহাতে, বিদ্রোহী সংগঠন কেইটাই ৰাজনৈতিক সংস্থাপনৰ বাবে মুখ্যমন্ত্রীক জনাই অহা দাবী সন্দৰ্ভত কৰা প্ৰশ্নৰ উত্তৰত ডেৰাই কয় যে ইতিমধ্যে ডিফু ভ্রমণৰ সময়ত মুখ্যমন্ত্ৰীগৰাকীয়ে আমাক প্রতিশ্রুতি প্রদান কৰি গৈছে যে কাৰ্বি আংলঙৰ হাওৰাঘাট বিধানসভা আৰু পৰিষদীয় সমষ্টিৰ পৰা বিদ্রোহী সংগঠনৰ সদস্যক ৰাজনৈতিক সংস্থাপন প্রদান কৰিব।
