প্ৰসূতিকালীন ছুটী মহিলাৰ অধিকাৰ। শুকুৰবাৰে উচ্চতম ন্যায়ালয়ে (Supreme Court) এই বিষয়ত মাদ্ৰাজ উচ্চ ন্যায়ালয়ৰ ৰায় বাতিল কৰে।
ন্যায়াধীশ অভয় এছ ওকা আৰু উজ্জ্বল ভুৱনৰ বিচাৰপীঠে পৰ্যবেক্ষণ কৰে যে প্ৰসূতিকালীন ছুটী মহিলাৰ প্ৰসূতিৰ সুবিধাৰ অবিচ্ছেদ্য অংগ। উচ্চতম ন্যায়ালয়ে লগতে সোঁৱৰাই দিয়ে যে আন্তঃৰাষ্ট্ৰীয় মানৱ অধিকাৰ আইনত সন্তান জন্ম দিয়াৰ অধিকাৰক স্বীকৃতি দিয়া হৈছে।
তামিলনাডুৰ এগৰাকী স্কুল শিক্ষয়িত্ৰীয়ে তৃতীয় সন্তান জন্ম দিয়াৰ পাছত ৰাজ্য চৰকাৰৰ ওচৰত প্ৰসূতিকালীন ছুটীৰ বাবে আবেদন জনাইছিল।
কিন্তু তামিলনাডুত চৰকাৰী কৰ্মচাৰীয়ে দুটাতকৈ অধিক শিশুৰ বাবে এই ছুটী নাপায়। জন্মৰ হাৰ নিয়ন্ত্ৰণৰ বাবে ৰাজ্য চৰকাৰে এই নিয়ম প্ৰৱৰ্তন কৰিছিল। ছুটী বিচাৰি মাদ্ৰাজ উচ্চ ন্যায়ালয়ৰ কাষ চাপিছিল শিক্ষয়িত্ৰীগৰাকীয়ে। কিন্তু তাতো তেওঁৰ আবেদন নাকচ কৰা হ’ল।
২০০৬ চনত বিবাহপাশত আবদ্ধ হোৱা শিক্ষয়িত্ৰীগৰাকীৰ ২০১৭ চনত বিবাহৰ অন্ত পৰে। ২০১৮ চনত তেওঁ পুনৰ বিবাহপাশত আবদ্ধ হয়। প্ৰথম বিবাহৰ পৰা তেওঁৰ দুটা সন্তান আছে। আৰু দ্বিতীয় বিয়াৰ পিছত আন এটা সন্তান জন্ম দিয়ে।
দুজন ন্যায়াধীশৰ বিচাৰপীঠে শিক্ষয়িত্ৰীগৰাকীক পুনৰ প্ৰসূতিকালীন ছুটী দিয়াৰ নিৰ্দেশ দি কয়, “প্ৰথম বিবাহৰ পৰাই দুটা সন্তান জন্ম দিয়াটো সঁচা। কিন্তু কৰ্মক্ষেত্ৰত প্ৰৱেশ কৰি পুনৰ বিয়া হোৱাৰ পিছত এইটোৱেই প্ৰথম সন্তান।”
এই গোচৰত উচ্চতম ন্যায়ালয়ে ৰায় দিয়ে যে বিদ্যালয়ৰ শিক্ষয়িত্ৰীগৰাকীয়ে শৰীৰ, গোপনীয়তা, সমতা, বৈষম্যৰ বিৰুদ্ধে থকা অধিকাৰ অনুসৰি প্ৰসূতিকালীন ছুটী পাব।
