অসম-নাগালেণ্ড সীমান্তৰ কাৰ্বিআংলঙৰ সীমামূৰীয়া অঞ্চলত বৰবিহ সদৃশ মাৰাত্মক ড্ৰাগছৰ বিৰুদ্ধে অভিযান তীব্ৰতৰ কৰি তোলাৰ সময়তে মঙলবাৰে বিয়লি প্ৰায় ৪ মান বজাত বোকাজান মহকুমাৰ শুকান জানত আৰক্ষীৰ অভিযানত প্ৰায় ২০ কোটি টকা মূল্যৰ সন্দেহযুক্ত কানি উদ্ধাৰ কৰবলৈ সক্ষম হয় ৷
প্ৰাপ্ত খবৰ অনুসৰি এক গোপন খবৰৰ ভিত্তিত বোকাজান মহকুমা আৰক্ষী বিষয়া ৰুস্তমৰাজ ব্ৰক্ষ্মৰ নেতৃত্বত আৰু উপ পৰিদৰ্শক বিপ্লৱ দাস লগতে থানা ষ্টাফৰ সহযোগত শুকানজানত চলোৱা তালাচীত উদ্ধাৰ কৰা হয় এই বৃহৎ পৰিমানৰ কানিখিনি ৷ কোহিমাৰ পৰা নগাওঁ অভিমুখে আহি থকা AS01 DB 5739 ক্ৰেটা বাহনত তালাচী চলাওতে বাহনখনৰ পিছফালৰ চকাৰ ৰাণিং বোৰ্ডৰ কাষত ক’লা কাপোৰেৰে কৌশলগত ভাবে লুকুৱাই ২০ টা পেকেটত ১৮ কেজি ৩২ গ্ৰাম কানি উদ্ধাৰ কৰে আৰক্ষীয়ে ৷
এই সন্দৰ্ভত আৰক্ষীয়ে ক্ৰেটা চালক নগাওঁ জিলাৰ মজিবুৰ ৰহমানক আটক কৰিছে ৷ ঘটনাস্থলীত শীৰ্ষ আৰক্ষী বিষয়া ক্ৰমে জিলা আৰক্ষী অধীক্ষক সঞ্জীৱ কুমাৰ শইকীয়া ‘ অতিৰি আৰক্ষী অধীক্ষক (অপৰাধ) পাৰ্থ প্ৰতিম শইকীয়াই পৰিস্থিতিৰ বুজ লয় ৷ আনহাতে নিৰপেক্ষ সাক্ষীগণৰ সাক্ষাতে কানিখিনি জব্দ কৰি সৰবৰাহকাৰী মজিবুৰ ৰহমানক আৰক্ষীয়ে তদন্ত অব্যাহত ৰাখিছে বুলি জানিব পৰা গৈছে ৷
