কাইলৈ অনুষ্ঠিত হ’ব অসমৰ ৰাইজৰ হিয়াৰ আমঠু জুবিন গাৰ্গৰ (Zubeen Garg) শেষকৃত্যৰ অনুষ্ঠান। সোণাপুৰত সম্পূৰ্ণ ৰাজ্যিক মৰ্যাদাৰে কৰা হ’ব তেওঁৰ অন্তিম সংস্কাৰ।
ইতিমধ্যে ইয়াৰ বাবে ৰাজ্য চৰকাৰে সকলো প্ৰস্তুতি সম্পূৰ্ণ কৰি তুলিছে। মঙলবাৰে পুৱা ৮ বজাত সৰুসজাই ষ্টেডিয়ামৰ পৰা লৈ যোৱা হ’ব জুবিনৰ নশ্বৰ দেহ।
ইফালে যোৰহাটবাসীয়ে জুবিনৰ শেষকৃত্য তথা সমাধি ক্ষেত্ৰ যোৰহাটত নিৰ্মাণৰ বাবে কৰা দাবী প্ৰসংগত মুখ্যমন্ত্ৰী ডঃ হিমন্ত বিশ্ব শৰ্মাই আগবঢ়াইছে এক মন্তব্য। তেওঁ ঘোষণা কৰে যে জুবিনৰ চিতাভস্ম যোৰহাটলৈ নিয়া হ’ব।
এই সন্দৰ্ভত তেওঁ কয়, “জুবিন গাৰ্গৰ পৰিয়ালৰ সিদ্ধান্তমৰ্মে আমি জুবিন গাৰ্গৰ তেৰদিনীয়া মাংগলিক অনুষ্ঠানভাগি যোৰহাটত পালন কৰিম৷ সেইদিনাই অমি জুবিন গাৰ্গৰ চিতাভস্ম যোৰহাটৰ ৰাইজক আনুষ্ঠানিকভাৱে অৰ্পণ কৰিম৷”
আনহাতে, কাইলৈ অসমৰ সকলো শিক্ষানুষ্ঠান বন্ধ থাকিব বুলি উল্লেখ কৰে মুখ্যমন্ত্ৰীয়ে৷ অৱশ্যে কামৰূপ (ম) জিলাৰ বাহিৰে বাকী সকলো ঠাইতে চৰকাৰী কাৰ্যালয়সমূহ খোলা থাকিব বুলিও তেওঁ কয়৷
ইফালে জুবিন গাৰ্গৰ শেষকৃত্যৰ অনুষ্ঠানত ভাৰত চৰকাৰ আৰু বিভিন্ন ৰাজ্যৰ প্ৰতিনিধিয়ে অংশগ্ৰহণ কৰিব বুলিও জনায় মুখ্যমন্ত্ৰীয়ে৷ সেয়ে সুকলমে অনুষ্ঠানটি সম্পন্ন কৰাৰ মূল লক্ষ্য লোৱাৰ লগতে সকলো প্ৰকাৰৰ সতৰ্কতামূলক কঠোৰ ব্যৱস্থাও গ্ৰহণ কৰা হ’ব বুলি তেওঁ কয়৷
আনহাতে, সামাজিক মাধ্যমৰ এক পোষ্টত মুখ্যমন্ত্ৰীয়ে লিখিছে, “জুবিনৰ সংগীতে সীমাৰ পৰিধি ভাঙি দেশ তথা বিশ্বৰ অগণন লোকৰ হৃদয় স্পৰ্শ কৰিছিল। ই ইতিমধ্যেই প্ৰমাণিত হৈছে৷ চুবুৰীয়া ৰাষ্ট্ৰ ভূটানৰ মহামান্য নৃপতিগৰাকীয়ে প্ৰিয় জুবিনৰ প্ৰতি শ্ৰদ্ধাঞ্জলি জনাবলৈ বিশেষ প্ৰতিনিধিক গুৱাহাটীলৈ প্ৰেৰণ কৰিছে আৰু আজি তেখেতসকলে শেষ শ্ৰদ্ধা নিবেদন কৰে।”
