কেৱল অনলাইন ৰে’লৰ (Indian Railway) টিকট কাটিলেহে দুৰ্ঘটনা বীমাৰ ব্যৱস্থা কৰা হয়? ৰে’ল দুৰ্ঘটনা হ’লে অফলাইনত ৰে’লৰ টিকট বুকিং কৰাসকলক বীমা কিয় দিয়া নহয়? উচ্চতম ন্যায়ালয়ে ভাৰতীয় ৰে’লৱেক ইয়াৰ কাৰণ স্পষ্ট কৰিবলৈ কয়।
ভাৰতীয় ৰে’লৱেই যাত্ৰীৰ সুৰক্ষা সন্দৰ্ভত উচ্চতম ন্যায়ালয়ত দাখিল কৰিছে এক প্ৰতিবেদন। উক্ত প্ৰতিবেদনৰ ভিত্তিত উচ্চতম ন্যায়ালয়ৰ ন্যায়াধীশ এহছানুদ্দিন আমানুল্লাহ আৰু ন্যায়াধীশ কে বিনোদ চন্দ্ৰনে ৰে’লৱেক প্ৰশ্ন কৰে। দুগৰাকী ন্যায়াধীশৰ বিচাৰপীঠে অতিৰিক্ত ছলিচিটৰ জেনেৰেল (এ এছ জি) বিক্ৰমজিৎ বেনাৰ্জীক প্ৰশ্ন কৰে যে দুটা চেনেলৰ জৰিয়তে টিকট ক্ৰয় কৰা যাত্ৰীসকলৰ বাবে কিয় দুবিধ সুবিধা আছে। অনলাইনত টিকট বুকিং কৰাসকলকহে কিয় দুৰ্ঘটনাৰ বীমাৰ ব্যৱস্থা কৰা হৈছে?
২৫ নৱেম্বৰত উচ্চতম ন্যায়ালয়ৰ নিৰ্দেশত কোৱা হৈছে, “ৰে’লৱেই উল্লেখ কৰিছে যে অনলাইনযোগে ৰে’লৰ টিকট বুকিং কৰাসকলক দুৰ্ঘটনা বীমা প্ৰদান কৰা হয়। যিসকলে অনলাইনত টিকট বুকিং নকৰে তেওঁলোকক সেই সুবিধা প্ৰদান কৰা নহয়। এই বৈষম্যৰ বিষয়ে এ এছ জিক অৱগত কৰা উচিত।” প্ৰতিবেদনখন পৰীক্ষা কৰাৰ পিছত উচ্চতম ন্যায়ালয়ে ৰে’লৱেক লাইন আৰু ক্ৰছিঙৰ সুৰক্ষাৰ প্ৰতি সতৰ্ক হ’বলৈও কয়।
উচ্চতম ন্যায়ালয়ে পৰ্যবেক্ষণ কৰে যে প্ৰতিবেদনত ৰে’লযাত্ৰীক সুৰক্ষা প্ৰদানৰ বাবে গ্ৰহণ কৰা ব্যৱস্থাৰ সময়সীমাৰ কথা উল্লেখ কৰা হোৱা নাই। সেয়েহে উচ্চতম ন্যায়ালয়ে ৰে’লৱেক নতুন শপতনামা দাখিল কৰিবলৈ নিৰ্দেশ দিয়ে। ইয়াৰ উপৰি বীমা বিষয়ত প্ৰশ্নৰ উত্তৰ অন্তৰ্ভুক্ত কৰিবলৈ কোৱা হৈছে। এই গোচৰৰ পৰৱৰ্তী শুনানি ২০২৬ চনৰ ১৩ জানুৱাৰীত হ’ব।
