ৰাজ্যত এতিয়াও কানিৰ প্ৰচলন অব্যাহত আছে৷ নিষিদ্ধ কানিৰ অবাধ প্ৰচলনৰ বিৰুদ্ধে ৰাজ্যৰ আৰক্ষী প্ৰশাসন নিতৌ সষ্টম হৈ আছে৷ শেহতীয়াকৈ পাহাৰীয়া জিলা কাৰ্বি আংলঙৰ অসম-নাগালেণ্ড সীমান্ত পুৰণি লাহৰিজানত জব্দ কৰা হৈছে বুজন পৰিমাণৰ কানি৷
আৰক্ষীয়ে জিজে ০১ আৰএক্স ৩৬৪৯ নম্বৰৰ এখন ক্ৰেটা বাহনৰ পৰা বৃহৎ পৰিমাণৰ নিচাজাতীয় সামগ্ৰী জব্দ কৰিবলৈ সক্ষম হয়৷ উল্লিখিত বাহনখনত এক গোপন চেম্বাৰ সাজি বৃহৎ পৰিমানৰ কানি সৰবৰাহ কৰিছিল৷ প্ৰাপ্ত তথ্য মতে মণিপুৰৰ পৰা ৰাজস্থানলৈ নিয়াৰ পথত পুৰণি লাহৰিজান আৰক্ষীৰ তীব্ৰ তালাচীত বৃহৎ পৰিমাণৰ কানি জব্দ কৰে৷ উল্লেখ্য যে ২২টা প্লাষ্টিকৰ পেকেটত মেৰিয়াই কানিখিনি সৰবৰাহ কৰিছিল৷
আৰক্ষীয়ে কানিসহ ৰাজস্থানৰ তিনিটাকৈ সৰবৰাহকাৰীক গ্ৰেপ্তাৰ কৰে৷ গ্ৰেপ্তাৰ তিনি সৰবৰাহকাৰী ক্ৰমে লক্ষ্মণ সিং (ৰাজস্থান), পৰ্বত সিং (ৰাজস্থান) আৰু সৰমিত সিং (ৰাজস্থান)৷ জব্দ কৃত কানিখিনিৰ ওজন প্ৰায় ১৯.৩৩৮ কিলোগ্ৰাম৷ ইয়াৰ বজাৰ মূল্য প্ৰায় ৪৫ লাখৰো অধিক৷
