ৰাজ্যিক বিজেপিৰ জ্যেষ্ঠ নেতা (Senior BJP Leader) তথা প্ৰাক্তন কেন্দ্ৰীয় মন্ত্ৰী (Former central Minister) কবীন্দ্ৰ পুৰকায়স্থ (Kabindra Purkayastha) আৰু নাই। উত্তৰ-পূব বিজেপিৰ পিতামহ সদৃশ বৰ্ষীয়ান ৰাজনীতিকগৰাকীৰ বুধবাৰে সন্ধিয়া ৫.০৬ বজাত শিলচৰ মেডিকেল কলেজ হাস্পতাল (Silchar Medical College Hospital)ত ৯৬ বছৰ বয়সত মৃত্যু (Death at the age of 96) হয়। বাৰ্ধক্যজনিত ৰোগত আক্ৰান্ত হৈ তেওঁ বিগত কেইবাদিনো ধৰি তেওঁ শিলচৰ মেডিকেল কলেজ হাস্পতালত আই চি ইউত ভেণ্টিলেটৰত চিকিৎসাধীন হৈ আছিল। তেওঁ হদযন্ত্ৰ, বৃক্ক আৰু শ্বাস-প্ৰশ্বাসজনিত সমস্যাতো ভুগি আছিল। তেওঁৰ মৃত্যুত ৰাজ্যিক বিজেপি, কাছাৰ জিলা বিজেপিৰ লগতে বিভিন্ন মহলে শোক প্ৰকাশ কৰিছে।
আনহাতে, কবীন্দ্ৰ পুৰকায়স্থৰ মৃত্যুত গভীৰ শোক প্ৰকাশ কৰিছে মুখ্যমন্ত্ৰী ডঃ হিমন্ত বিশ্ব শৰ্মাই। সামাজিক মাধ্যমত লিখা এক শোকবাৰ্তাত মুখ্যমন্ত্ৰীয়ে লিখিছে, “ভাৰতীয় জনতা পার্টীৰ অসমৰ ধ্বজাবাহক, দূৰদর্শী তথা জনদৰদী নেতা, প্রাক্তন কেন্দ্রীয় মন্ত্রী শ্রদ্ধেয় কবীন্দ্র পুৰকায়স্থদেৱৰ মহাপ্রয়াণৰ বার্তাত মই গভীৰভাৱে মর্মাহত। তেওঁৰ নেতৃত্বত অসমত স্থাপন হোৱা ভাৰতীয় জনতা পার্টী তথা ৰাষ্ট্রীয়তাবাদী আদর্শৰ ভেটিয়ে আজি এক বিশাল বটবৃক্ষৰ ৰূপ ধাৰণ কৰিছে। বৰাক উপত্যকা তথা অসমৰ লগতে দেশৰ সামাজিক-ৰাজনৈতিক ক্ষেত্রতো শ্রদ্ধেয় পুৰকায়স্থদেৱৰ অৱদান অনবদ্য আৰু অনন্য। তেওঁৰ প্রয়াণ আমাৰ সামাজিক জীৱনৰ বাবে এক অপূৰণীয় ক্ষতি।”
তেওঁ লগতে লিখিছে, “শিলচৰৰ এগৰাকী বিজেপি কার্যকর্তাৰ পৰা কেন্দ্রীয় মন্ত্রী হোৱালৈকে তেওঁৰ সুদীর্ঘ জীৱন পৰিক্রমা আমাৰ বাবে জনসেৱা আৰু নিঃস্বার্থ সমর্পণৰ উৎকৃষ্ট দৃষ্টান্ত হৈ থাকিব। তেওঁৰ আদৰ্শ আৰু কৰ্মৰাজিয়ে প্রতিগৰাকী কার্যকর্তাক অনুপ্রেৰণা যোগাব। এই শোকৰ মুহূর্তত তেওঁৰ পৰিয়ালৰ লগতে অসমবাসী তথা ভাৰতীয় জনতা পার্টীৰ পৰিয়াল শোকাহত হৈ আছে। ভগৱানৰ ওচৰত তেওঁৰ বিদেহ আত্মাৰ সদ্গতি কামনা কৰিছোঁ আৰু পৰিয়াল, আত্মীয়-স্বজন তথা গুণমুগ্ধৰ প্ৰতি গভীৰ সমবেদনা জনাইছোঁ।”
উল্লেখ্য যে ১৯৩১ চনৰ ১৫ ডিচেম্বৰত অবিভক্ত ভাৰত তথা বৰ্তমান বাংলাদেশৰ অন্তৰ্গত চিলেট জিলাৰ কমাৰশালত কবীন্দ্ৰ পুৰকায়স্থৰ জন্ম হৈছিল। তেওঁ গুৱাহাটী বিশ্ববিদ্যালয়ৰ পৰা স্নাতকোত্তৰ লাভ কৰিছিল। ১৯৯৮ চনৰ পৰা ১৯৯৯ চনলৈ তেওঁ অটল বিহাৰী বাজপেয়ী চৰকাৰত যোগাযোগ বিভাগৰ ৰাজ্যিক মন্ত্ৰী আছিল। তেওঁ ১৯৯১ চনত শিলচৰ লোকসভা সমষ্টিৰ পৰা প্ৰথমবাৰৰ বাবে লোকসভালৈ নিৰ্বাচিত হৈছিল । ইয়াৰ পিছত ১৯৯৮ আৰু ২০০৯ চনত লোকসভালৈ নিৰ্বাচিত হৈছিল যদিও ২০১৪ চনত পৰাস্ত হয়।
