খটখটী (Khatkhati)ত সংঘটিত হৈছে এক চাঞ্চল্যকৰ ঘটনা। এই ঘটনাত বিদেশত নিৰ্মিত আগ্নেয়াস্ত্ৰ (Foreign-made firearms)সহ এজন যুৱকক আৰক্ষীয়ে গ্ৰেপ্তাৰ (Arrested) কৰে। আনহাতে, এই ঘটনাৰ সৈতে জড়িত এগৰাকী মহিলা সহযোগীকো আটক কৰি আৰক্ষীয়ে নিজৰ জিম্মাত লৈছে।
প্ৰাপ্ত তথ্য অনুসৰি, বুধবাৰে পুৱা প্ৰায় ১১.৩০ বজাত NL-07-R-0297 নম্বৰৰ এখন স্কুটিত এজন পুৰুষ আৰু এগৰাকী মহিলা লাহৰিজান দিশৰ পৰা চাণ্ডে বজাৰ অভিমুখে আহি আছিল। কিন্তু সেই সময়তে চাণ্ডে বজাৰ ৰে’লৱে ক্ৰছিং গে’টৰ সমীপত স্কুটিখন দুৰ্ঘটনাত পতিত হয়। এই দুৰ্ঘটনাত দুয়ো স্কুটি আৰোহী পথত বাগৰি পৰি আঘাতপ্ৰাপ্ত হয়।
ইফালে এই দুৰ্ঘটনাটো সংঘটিত হোৱাৰ পিছত স্থানীয় লোকে তৎক্ষণাৎ খটখটি আৰক্ষী থানাক খবৰ দিয়ে। এই খবৰ লাভ কৰাৰ লগে লগে খটখটি থানাৰ ভাৰপ্ৰাপ্ত বিষয়া সূৰ্য কুমাৰ বৰাৰ নেতৃত্বত উপ-পৰিদৰ্শক দেৱাশীষ বৰা, গোবিন কাকতি আৰু কাৰাগাঁও আউটপোষ্টৰ ভাৰপ্ৰাপ্ত বিষয়া অমৰজ্যোতি শৰ্মা আৰক্ষী বাহিনীৰ সৈতে ঘটনাস্থলীত উপস্থিত হয়। আৰক্ষীয়ে ঘটনাস্থলীৰ পৰা আঘাতপ্ৰাপ্ত দুয়োগৰাকী স্কুটি আৰোহীক উদ্ধাৰ কৰাৰ লগতে স্কুটিখন জব্দ কৰে।
কিন্তু জব্দকৃত স্কুটিখনৰ তালাচী চলাওঁতে সকলোৰে চকু কপালত উঠে। স্কুটিখনৰ পৰা আমেৰিকাত নিৰ্মিত এটা .৩২ পিষ্টল আৰু দুটা সজীৱ গুলী আৰক্ষীয়ে উদ্ধাৰ কৰে। আনহাতে, আৰক্ষীয়ে গ্ৰেপ্তাৰ কৰা লোক দুজন ডিমাপুৰৰ বাৰ্মা কেম্প অঞ্চলৰ বাসিন্দা মেজাকুংবো (পিতৃ– এৰিবো) আৰু জুথিউলিয়ু (স্বামী– বিধান) বুলি জানিব পৰা গৈছে। ইফালে এই ঘটনাক লৈ সমগ্ৰ অঞ্চলটোতে তীব্ৰ চাঞ্চল্যৰ সৃষ্টি হয়। আৰক্ষীয়ে ইতিমধ্যে ঘটনাৰ বিশদ তদন্ত আৰম্ভ কৰিছে।
