ASSAM TIMES POST
অজন্তা তালুকদাৰ, বোকাখাত
সেউজ কৃষি ভূমি অসমৰ প্ৰতিটো জনগোষ্ঠীৰ স্বকীয় উৎসৱ জাতিটোৰ গৌৰৱ তথা সম্পদ। সংস্কৃতিত চহকী অসমৰ অন্যতম বৃহৎ জনগোষ্ঠী মিচিং জনগোষ্ঠীয়ে ফাগুণৰ প্ৰথমটো বুধবাৰে পালন কৰা কৃষিভিত্তিক আৰু আবেগিক উৎসৱ হ’ল আলি-আয়ে-লৃগাং। আজি সমগ্ৰ ৰাজ্যৰ লগতে বোকাখাততো মিচিং জনগোষ্ঠী অধ্যুষিত এলেকা সমূহত উৎসাহ আৰু আড়ম্বৰপূৰ্ণভাৱে উদযাপিত হয় লৃগাং। ইয়াৰ ৰজাবাৰীৰ ভকত চাপৰিতো পৰম্পৰাগতভাৱে উদযাপিত হ’ল এই বসন্ত উৎসৱ।
ভকত চাপৰিৰ সামূহিক ভৱনত উদযাপিত লৃগাং আছিল একান্ত সংস্কাৰমুখী। অঞ্চলটোৰ বিভিন্ন জাতি জনগোষ্ঠীৰ এই উমৈহতীয়া মঞ্চত সাধাৰণতে উদযাপন হোৱাৰ বিপৰীতে মাংসৰ বাবে হত্যা কৰা নহ’ল গাহৰিলৃগাং উৎসৱত ছাঁই মদৰ সমজুৱা ব্যৱহাৰ নকৰাকৈয়ে অটুত ৰাখিলে পৰম্পৰা। অঞ্চলটোৰ বিশিষ্ট সমাজকৰ্মী দূৰ্গেশ্বৰ দলেই কয় যে কিছু সংস্কাৰৰ সংযোগেৰে এইবাৰ অনুষ্ঠিত কৰা আলি-আয়ে-লৃগাং কেৱল মিচিঙৰ উৎসৱ কৰি নাৰাখি সকলোৰে উপভোগ্য কৰিবলৈ এনে ব্যৱস্থা কৰা হৈছে।
অৱশ্যে বীজ ৰোপণত সামান্য ছাঁই মদ ব্যৱহাৰ কৰা হৈছে। সৰ্বাধিক মিচিং বসতিপ্ৰধান অঞ্চলটোৰ এই অনুষ্ঠানটোৰ পুৱা পতাকা উত্তোলন কৰে উদযাপন সমিতিৰ সভাপতি বোধেন দলেই। বীজ ৰোপনৰ শুভাৰম্ভ কৰে আদৰ্শ কৃষক আপাল মৰাঙে। ছাতিৰ ওপৰত পৰম্পৰাগত বস্ত্ৰ মেলি মঞ্চলৈ আদৰি অনা হয় প্ৰতিগৰাকী অতিথিক।
আৰম্ভ হয় গোমৰাগ নৃত্য। তিনি শতাধিক ডেকা-গাভৰুৰ এই নৃত্যত সহযোগ কৰে অতিথি সকলেও। ইয়াৰ পাছত বিশিষ্ট শিক্ষাবিদ অমূল্য পেগুৰ সভাপতিত্বত অনুষ্ঠিত এক সভাত জ্যেষ্ঠ সাংবাদিক বুবুল দত্ত বিশিষ্ট অতিথি হিচাপে উপস্থিতি থাকি নৈ আৰু মিচিং সমাজৰ যাউতী-যুগীয়া সম্পৰ্ক, সেই সম্পৰ্ক প্ৰাকৃতিক দুৰ্যোগৰ বাবে ত্যাগ কৰি নৈ বিহীন ভকত চাপৰিত ব্যতিক্ৰমীভাৱে উদযাপন কৰা লৃগাঙক প্ৰশংসা কৰে।
অনুষ্ঠানত সমাজকৰ্মী ৰেব গগৈ, বিপুল দাস উপস্থিত থাকি বক্তব্য প্ৰদান কৰে। এই সভাতে সাংবাদিক মাধৱজ্যোতি দত্ত, ত্ৰিনয়ন বৰা আৰু উত্তম শৰ্মাক সম্বৰ্দ্ধনা জনোৱা হয়। আগন্তুক বৰ্ষতো সকলো জাতি জনগোষ্ঠী মিলি লৃগাং পতাৰো সিদ্ধান্ত গ্ৰহণ কৰে।
