ASSAM TIMES POST
ন-বোৱাৰী মাৰ্চি বৰাৰ ৰহস্যজনক আত্মহত্যাৰ খৰতকীয়া তদন্ত
আৰক্ষীয়ে পাইছে ‘বহু ক্লু’
ডিফু: অৱশেষত গ্ৰেপ্তাৰ হ’ল মাৰ্চি বৰাৰ স্বামী প্ৰণৱ বৰা ৷ কাৰ্বি আংলং জিলাৰ ডকমকা থানাৰ অধীনস্থ কামপুৰীয়া গাঁৱত মাথোঁ দুমাহ পূৰ্বে বিবাহপাশত আৱদ্ধ হোৱা ন-বোৱাৰী মাৰ্চি বৰাই ১৪ ফেব্ৰুৱাৰীত ভেলেন্টাইন ডে’ৰ দিনা ৰহস্যজনকভাৱে আত্মহত্যা কৰাৰ পিছত বিগত প্ৰায় এসপ্তাহ ধৰি ৰাজ্যজুৰি ব্যাপক চাঞ্চল্য অব্যাহত আছে ৷
কিয় কি পৰিস্থিতিত আত্মহনন পথ বাছি ল’লে মাৰ্চিয়ে ? সকলোৰে মনত এই প্ৰশ্নই দোলা দি থকাৰ সময়তে বৃহস্পতিবাৰে সন্ধিয়া ডকমকা আৰক্ষীয়ে গ্ৰেপ্তাৰ কৰে মাৰ্চি বৰাৰ স্বামী প্ৰণৱ বৰাক ৷ উল্লেখ্য যে ডকমকাৰ কামপুৰীয়া গাঁৱত থকা স্বামীগৃহৰ শোৱনি কোঠাত ৰহস্যজনকভাৱে সন্ধিয়া চীপ লোৱা অৱস্থাত মাৰ্চিৰ মৃতদেহ উদ্ধাৰ হৈছিল ৷ ন্যায় বিচাৰি মাৰ্চিৰ পৰিয়ালে ১৭ ফেব্ৰুৱাৰীত গোচৰ তৰিছিল ডকমকা থানাত ৷
লগে লগে থানাত পঞ্জীয়নভূক্ত গোচৰ নং 9/2020 ৰ ভিত্তিত ডকমকা আৰক্ষীয়ে তদন্ত চলাই ভাৰতীয় দণ্ডবিধিৰ ধাৰা 306 ৰ অধীনত বৃহস্পতিবাৰে সন্ধিয়া গ্ৰেপ্তাৰ কৰে ন-বোৱাৰী মাৰ্চি বৰাৰ স্বামী প্ৰণৱ বৰাক ৷উল্লেখ্য যে তদন্তত স্বামী প্ৰণৱৰ বিৰুদ্ধে Abetment of Suicide ৰ যথেষ্ট ‘ক্লু’ পাইছে ডকমকা আৰক্ষীয়ে ৷
স্মৰ্তব্য অগ্নি নিৰ্বাপক বাহিনীত কৰ্মৰত প্ৰণৱ বৰা চাকৰিৰ প্ৰশিক্ষণসূত্ৰে ঘটনা সংঘটিত হোৱাৰ দিনা মুম্বাইত আছিল ৷মাৰ্চিৰ স্বামী গ্ৰেপ্তাৰৰ পিছত স্বাভাৱিকবাৱেই দুখ অনুভৱ কৰা মাৰ্চিৰ মাতৃয়ে নিজ প্ৰতিক্ৰিয়া ব্যক্ত কৰি কয় যে মাৰ্চিৰ আত্মাই শান্তি পাবই লাগিব ৷ মই ন্যায় বিচাৰো ৷
একেই মন্তব্য পিতৃ বিয়োগৰ পিছত সৰুৰে পৰা মাৰ্চিক তুলি-তালি ডাঙৰ-দীঘল কৰা মাৰ্চিৰ খুড়া খিৰোদ বৰাৰ৷ ইপিনে, মাৰ্চি বৰাৰ স্বামী প্ৰণৱ বৰাক শুকুৰবাৰে (আজি) ডিফুৰ CJM আদালতত হাজিৰ কৰোৱা হয় ৷আৰক্ষীৰ জিম্মাত থকা মাৰ্চিৰ স্বামীয়ে দুয়োৰে মাজত কোনো ধৰণৰ কাজিয়া নাছিল বুলি মন্তব্য কৰে ৷
