কার্বি আংলং (Karbi Anglong) জিলাৰ চিলভেটাত আজি সংঘটিত এক মৰ্মান্তিক পথ দুৰ্ঘটনাত (Road accident) এগৰাকী মহিলা থিতাতে নিহত হোৱাৰ লগতে আন চাৰিজন গুৰুতৰভাৱে আহত হয়। খবৰ অনুসৰি ডিফুৰ পৰা দিছবাইলৈ যোৱা এখন জিপচি গাড়ী চিলভেটাত নিয়ন্ত্ৰণ হেৰুৱাই পথৰ কাষত থকা খাৱৈত বাগৰি পৰে। এই ঘটনাত গাড়ীত থকা বিনা ইংতিপী নামৰ এগৰাকী মহিলাৰ থিতাতে মৃত্যু হয়।
আনহাতে, গাড়ীৰ চালক মনোজ তেৰন, গাড়ীখনৰ আন যাত্ৰী কাৱে তিচপী, চোণালী ৰংপিপী আৰু চুনফৌ ৰংপিপী গুৰুতৰভাৱে আহত হয়। স্থানীয় ৰাইজৰ সহযোগত আৰক্ষীয়ে আহতসকলক উদ্ধাৰ কৰি প্ৰথমে স্থানীয় চিকিৎসালয়ত প্ৰাথমিক চিকিৎসা প্ৰদান কৰাৰ পিছত উন্নত চিকিৎসাৰ বাবে ডিফু চিকিৎসা মহাবিদ্যালয় আৰু চিকিৎসালয়লৈ প্ৰেৰণ কৰে।
প্ৰাথমিক অৱস্থাত গাড়ীখনৰ ব্ৰেক বিকল হোৱাৰ বাবেই এই দুৰ্ঘটনা সংঘটিত হোৱা বুলি সন্দেহ কৰা হৈছে। এই ঘটনাৰ বাবে অঞ্চলটোত দেখা গ’ল শোকৰ ছাঁ।
