অযোধ্যাৰ ৰাম মন্দিৰ (Ram Temple of Ayodhya)ত দানৰ ধন আৰু গহনা চুৰি (Theft of money and jewelry) কৰাৰ অভিযোগত তীব্ৰ চাঞ্চল্যৰ সৃষ্টি হৈছে। দানৰ ধন আৰু গহনা কেনেদৰে নোহোৱা হ’ল সেই সন্দৰ্ভত বিভিন্ন প্ৰশ্নৰ সন্মুখীন হৈছে মন্দিৰ কৰ্তৃপক্ষ। এই ঘটনাত মুখ্যমন্ত্ৰী যোগী আদিত্যনাথে ইতিমধ্যে তিনিজনীয়া বিশেষ তদন্তকাৰী দল (SIT) গঠনৰ নিৰ্দেশ দিছে।
মুখ্যমন্ত্ৰীৰ ওচৰত এই দুৰ্নীতিৰ তদন্তৰ দাবী জনাইছে শ্ৰীৰাম জন্মভূমি তীৰ্থ ক্ষেত্ৰ ট্ৰাষ্টে। তেওঁলোকৰ অনুৰোধৰ প্ৰতি সঁহাৰি জনাই যোগীয়ে শনিবাৰে এছ আই টি গঠনৰ নিৰ্দেশ দিয়ে। দলটোৰ নেতৃত্বত থাকিব লক্ষ্ণৌৰ সংমণ্ডল আয়ুক্ত বিজয় বিশ্বাস পন্ত। ইয়াৰ উপৰি লক্ষ্ণৌ ৰেঞ্জৰ আই জি কিৰণ এছ, বিত্ত বিভাগৰ বিশেষ সম্পাদক নীলৰতন কুমাৰক সাত দিনৰ ভিতৰত প্ৰাৰম্ভিক প্ৰতিবেদন দাখিল কৰিবলৈ কোৱা হৈছে। তদন্তকাৰী দলে ১৫ দিনৰ ভিতৰত চূড়ান্ত প্ৰতিবেদন ৰাজ্য চৰকাৰক দাখিল কৰিব লাগিব।
দানৰ ধন আৰু অলংকাৰ চুৰিৰ ঘটনা পোহৰলৈ আহিছিল এসপ্তাহ পূৰ্বে। চুৰিৰ অভিযোগ উত্থাপন হোৱাৰ পিছতে প্ৰাৰম্ভিক তদন্ত আৰম্ভ কৰে মন্দিৰ কৰ্তৃপক্ষই। সূত্ৰ অনুসৰি, মন্দিৰ ট্ৰাষ্টৰ বিষয়াসকলে সন্দেহযুক্ত লোককেইজনক জেৰা কৰে। স্থানীয় আৰক্ষী থানাৰ সহযোগত মন্দিৰ কৰ্তৃপক্ষই চুৰি হোৱা ধন আৰু অলংকাৰ উদ্ধাৰৰ চেষ্টা চলায়।
অৱশ্যে চুৰিৰ অভিযোগ পোহৰলৈ অহাৰ পিছৰে পৰা মন্দিৰ কৰ্তৃপক্ষই বিভিন্ন প্ৰশ্নৰ সন্মুখীন হৈ আহিছে। বিষয়টো পোহৰলৈ অহাত ৰাজ্য চৰকাৰে বিষয়টোত হস্তক্ষেপ কৰে। ইয়াৰ জৰিয়তে ক্ষিপ্ৰ তদন্তৰ নিৰ্দেশ দিয়া হয়। সূত্ৰ অনুসৰি, তদন্তকাৰী দলটোৱে অতি সোনকালে অযোধ্যাত উপস্থিত হৈ প্ৰমাণ সংগ্ৰহৰ কাম আৰম্ভ কৰিব। তদন্তকাৰীয়ে অনুদানৰ সামগ্ৰীবোৰ কেনেকৈ চোৱাচিতা কৰা হৈছিল, এই কামৰ বাবে কাক নিযুক্তি দিয়া হৈছিল এই সকলোবোৰ চাব।
