ৰাম মন্দিৰৰ অনুদান চুৰি কৰাৰ অভিযোগত সমগ্ৰ দেশতে তীব্ৰ জোকাৰণিৰ সৃষ্টি হৈছে। এইবাৰ উত্তৰ প্ৰদেশৰ মুখ্যমন্ত্ৰী আদিত্যনাথে (Yogi Adityanath) ঘটনা সন্দৰ্ভত মুখ খুলিছে।
এই ঘটনা কোনো ধৰণে সহ্য কৰা নহ’ব বুলি তেওঁ স্পষ্টকৈ উল্লেখ কৰি কয় যে ইয়াৰ লগত জড়িত কোনেও ৰেহাই নাপাব। লগতে এই ঘটনাৰ তদন্তৰ বাবে বিশেষ তদন্তকাৰী দল (SIT) গঠন কৰা হৈছে বুলিও তেওঁ জানিবলৈ দিয়ে।
আদিত্যনাথে আবেদন জনাইছে যে যদি কোনো লোকৰ হাতত এই অভিযোগৰ সৈতে জড়িত কোনো প্ৰমাণ আছে তেন্তে তেওঁলোকে এছআইটিৰ হাতত গতাই দিব লাগিব। তেওঁ কয়, “আমি ৰামচন্দ্ৰৰ বাবে ৫০০ বছৰ অপেক্ষা কৰিছোঁ। এছআইটিক ১৫ দিন দিয়ক।”
প্ৰতিদিনে ৰাম মন্দিৰত বৃহৎসংখ্যক ভক্তৰ সমাগম হয়।সকলোৱে প্ৰণামী বাকচত যিমান পাৰে দান দিয়ে। ৰাম মন্দিৰৰ দান বাকচত ধন, সোণ, গহনা আদিৰে ভৰি আছে। বিদেশৰ পৰাও চান্দা আহে। অভিযোগ যে চান্দাৰ ধন চুৰি হৈছে। টকাৰ উপৰি বিভিন্ন অলংকাৰো নিয়া হৈছে। সেই অভিযোগ পোহৰলৈ অহাৰ লগে লগে হুলস্থুলৰ সৃষ্টি হয়। এই ঘটনা কেনেকৈ সংঘটিত হ’ল সেই লৈ প্ৰশ্ন উত্থাপন হ’বলৈ ধৰে।
শুকুৰবাৰে এক অনুষ্ঠানত মুখ্যমন্ত্ৰী আদিত্যনাথে ৰাম মন্দিৰৰ ঘটনা সন্দৰ্ভত মুকলিকৈ কয়। এছআইটি গঠনৰ কথা ঘোষণা কৰি সকলোকে শান্ত হৈ থাকিবলৈ আহ্বান জনায়। তেওঁৰ এই অনুৰোধ কাৰো প্ৰভাৱত পৰিব নালাগে বুলিও কয়। এছআইটিয়ে নিজাববীয়াকৈ তদন্ত কৰিবলৈ কমেও ১৫ দিন দিব লাগে বুলি কয়।
তেওঁ কয়, “ৰামভক্তসকললৈ মোৰ বিনম্ৰ অনুৰোধ, ভগৱান ৰামে আমাক মৰ্যাদা আৰু সংযমৰ পথত খোজ দিবলৈ শিকাইছে। আমি ৫০০ বছৰ ধৰি অনুশাসনৰ সৈতে সংগ্ৰাম কৰি আহিছোঁ ৰাম জন্মভূমি পুনৰুদ্ধাৰ কৰিবলৈ। আৰু ১৫ দিন অপেক্ষা কৰক। ধৈৰ্য ধৰক। চিন্তা নকৰিব।”
একে সময়তে আদিত্যনাথে বিৰোধীকো লক্ষ্য কৰি লয়। অযোধ্যাক অপ্ৰয়োজনীয়ভাৱে ‘বদনাম’ নকৰাকৈ তদন্তকাৰীক সহায় কৰিব লাগে বুলিও তেওঁ কয়। কংগ্ৰেছক আক্ৰমণ কৰি আদিত্যনাথে কয়, “তেওঁলোকে ৰাম মন্দিৰৰ বিৰোধিতা কৰিছিল। আনকি ভগৱান ৰামৰ অস্তিত্বক লৈয়ো প্ৰশ্ন উত্থাপন কৰি শপতনামাও দাখিল কৰিছিল। এতিয়া কংগ্ৰেছে অযোধ্যাৰ উন্নয়নৰ কথা কৈছে।”
উত্তৰ প্ৰদেশৰ মুখ্যমন্ত্ৰীয়ে কয়, “কংগ্ৰেছে এতিয়া কৈছে যে ৰামভক্তক অপমান কৰা হৈছে। যেতিয়া উচ্চতম ন্যায়ালয়ত ভগৱান ৰামৰ অস্তিত্বক লৈ প্ৰশ্ন উত্থাপন হৈছিল, তেতিয়া সেয়া অপমান নাছিল নেকি?” কংগ্ৰেছৰ উপৰি আদিত্যনাথে সমাজবাদী পাৰ্টীকো লক্ষ্য কৰি লয়। আনহাতে, ৰাম মন্দিৰৰ বাবে ধন অপব্যৱহাৰৰ অভিযোগ উত্থাপন হোৱা বিতৰ্কৰ মাজতে ৰাম জন্মভূমি মন্দিৰ নিৰ্মাণ সমিতিৰ অধ্যক্ষ নৃপেন্দ্ৰ মিশ্ৰই সংস্কাৰৰ পোষকতা কৰিছে।
ইণ্ডিয়া টুডেৰ সৈতে হোৱা এক সাক্ষাৎকাৰত তেওঁ কয়, “কথিত অনিয়মে ভক্তসকলৰ বিশ্বাসত আঘাত কৰাই নহয়, মন্দিৰৰ প্ৰশাসনিক গাঁথনিৰ দুৰ্বলতাৰো স্পষ্ট ইংগিত দিয়ে।” তেওঁ কয়, “মই আনুষ্ঠানিকভাৱে কোনো প্ৰস্তাৱ দাখিল কৰা নাই, কিন্তু ৰাজহুৱাভাৱে মোৰ মতামত প্ৰকাশ কৰিছোঁ। মই দৃঢ় বিশ্বাস কৰোঁ যে সমগ্ৰ পৰিচালনা গাঁথনি পুনৰ্গঠন কৰি অভিজ্ঞ পেছাদাৰীসকলক দিব লাগে।”
