উত্তৰ প্ৰদেশৰ গোৰখপুৰত এটি ৯ মহীয়া কেঁচুৱাক ধৰ্ষণৰ (Minor Rape Case) অভিযোগ। এই ঘটনাত এজন ১২ বছৰীয়া নাবালকৰ বিৰুদ্ধে অভিযোগ উত্থাপন হৈছে। ইতিমধ্যে নাবালকজনক গ্ৰেপ্তাৰ কৰিছে আৰক্ষীয়ে। তদন্তকাৰীয়ে তেওঁৰ পৰা এটা মোবাইল ফোনো জব্দ কৰিছে। যোৱা শুকুৰবাৰে নিশা সংঘটিত হয় এই ঘটনা।
ঘটনাৰ নিশা শিশুটিৰ মাতৃয়ে তেওঁক কাষত লৈ শুই আছিল। পিছত পুৱা প্ৰায় ২ বজাত তেওঁ লক্ষ্য কৰে যে কাষত শিশুটি নাই। নিশাতে পৰিয়ালৰ লোকে চাৰিওফালৰ অঞ্চলত তালাচী আৰম্ভ কৰে। অৱশেষত শনিবাৰে পুৱা ঘৰৰ পৰা প্ৰায় ৫০০ মিটাৰ দূৰৈৰ পথাৰত থকা টিনপাতৰ চালিৰ তলৰ পৰা তেজেৰে লুতুৰি-পুতুৰি অৱস্থাত শিশুটিক উদ্ধাৰ কৰে।
চিকিৎসালয়লৈ নিয়াৰ সময়ত চিকিৎসকে নিশ্চিত কৰে যে তেওঁক যৌন নিৰ্যাতন চলোৱা হৈছে। ঘটনাৰ তদন্তৰ বাবে প্ৰথমে পৰিয়ালৰ লোকৰ সৈতে আৰক্ষীয়ে কথা পাতে। ইয়াৰ ফলত তদন্তকাৰীয়ে ১২ বছৰীয়া নাবালক আত্মীয়জনৰ ওপৰত সন্দেহ প্ৰকাশ কৰে।
তিনিদিন পূৰ্বে তেওঁ চণ্ডীগড়ৰ পৰা গোৰখপুৰৰ ঘৰলৈ আহিছিল। তেনেকৈয়ে তদন্তকাৰীয়ে নাবালকজনক ধৰি সোধা-পোছা কৰিবলৈ ধৰে। দেওবাৰে পুৱা জেৰাৰ সময়ত তেওঁৰ কথা আৰক্ষীৰ বাবে যথেষ্ট অসংলগ্ন যেন লাগিছিল। পিছত তদন্তকাৰীয়ে তেওঁক নিজৰ জিম্মালৈ নিয়ে।
আৰক্ষীৰ সূত্ৰ অনুসৰি পিটিআইৰ খবৰ মতে, নাবালকজনে পিছত আৰক্ষীৰ আগত এই ঘটনা স্বীকাৰ কৰে। নাবালকজনে শুকুৰবাৰে নিশা সুৰা সেৱন কৰা বুলি আৰক্ষীক জনায়।
ইয়াৰ পিছত তেওঁ মোবাইলত পৰ্ণও চাইছিল। পিছত ৰাতি শুই থকা শিশুটিক তুলি লৈ যায়। তেওঁৰ পৰা উদ্ধাৰ হোৱা মোবাইলটোও তদন্তকাৰীয়ে পৰীক্ষা কৰিছে। সূত্ৰ অনুসৰি, তাত ৫০টাতকৈও অধিক আপত্তিজনক ভিডিঅ’ পোৱা গৈছে।
সেই মোবাইলৰ পৰা বিভিন্ন পৰ্ণগ্ৰাফিক ৱেবছাইটতো প্ৰৱেশ কৰা হৈছিল। গোৰখপুৰৰ আৰক্ষী অধীক্ষক নিমেশ পাটিলে জানিবলৈ দিয়া মতে, বৰ্তমান নিৰ্যাতিত শিশুটি চিকিৎসাধীন হৈ আছে। লগতে এই ঘটনাত উপযুক্ত আইনী ব্যৱস্থা গ্ৰহণ কৰা হৈছে বুলিও তেওঁ কয়।
