‘অপাৰেচন সিন্দুৰ’ৰ পিছত ৰাছিয়া আৰু ভাৰতে যৌথভাৱে নিৰ্মাণ কৰা ব্ৰহ্মছ ছুপাৰছ’নিক ক্ৰুজ মিছাইলৰ চাহিদা ক্ৰমান্বয়ে আন্তঃৰাষ্ট্ৰীয় অস্ত্ৰ বজাৰত বৃদ্ধি পাইছে।
এইবাৰ পশ্চিম এছিয়াৰ দেশ সংযুক্ত আৰব আমিৰশ্বাহীয়ে ভাৰতৰ পৰা এই ক্ষেপণাস্ত্ৰ ক্ৰয়ৰ বাবে আলোচনা আৰম্ভ কৰিছে বুলি সংবাদ সংস্থা ৰয়টাৰে প্ৰকাশ কৰা এক প্ৰতিবেদনত প্ৰকাশ পাইছে।
কেইমাহমানৰ আগতে প্ৰতিৰক্ষা মন্ত্ৰালয়ে জনাইছিল যে ব্ৰহ্মছ বিক্ৰীৰ সন্দৰ্ভত ইণ্ডোনেছিয়াৰ সৈতে চৰকাৰী পৰ্যায়ত আলোচনা চূড়ান্ত পৰ্যায়ত আছে। ইণ্ডোনেছিয়া চৰকাৰেও একে কথা অৱগত কৰিছিল।
পিছলৈ নতুন দিল্লীৰ ব্ৰাজিল, ভিয়েটনাম, থাইলেণ্ড, দক্ষিণ আফ্ৰিকা, চিলি আদি দেশৰ সৈতেও ছুপাৰছ’নিক (শব্দতকৈ দ্ৰুত) ক্ৰুজ মিছাইল ক্ৰয় কৰাৰ আলোচনা হয়। এইবাৰ সেই তালিকাত সংযুক্ত আৰব আমিৰশ্বাহীৰ নামো সংযোজন হৈছে।
ৰাছিয়াৰ সৈতে যৌথ উদ্যোগত নিৰ্মিত নতুন দিল্লীৰ ‘ব্ৰহ্মছ’ ছুপাৰছ’নিক ক্ৰুজ মিছাইলৰ মূল সংস্কৰণ চাৰিটা। যুদ্ধ জাহাজ, ছাবমেৰিন, যুদ্ধ বিমান আৰু স্থল বাহিনীৰ লঞ্চাৰৰ পৰা সেনাই উৎক্ষেপণ কৰিব পাৰে। ইয়াৰ উৎপাদন কোম্পানী হৈছে ‘ব্ৰহ্মছ এৰ’স্পেচ লিমিটেড’। এই ক্ষেপণাস্ত্ৰই শব্দৰ প্ৰায় তিনিগুণ বেগত যাত্ৰা কৰি লক্ষ্যত সঠিকভাৱে আঘাত কৰিব পাৰে।
বৰ্তমান ভাৰতীয় সেনাৰ হাতত থকা ‘ব্ৰহ্মছ মাৰ্ক-১’ৰ ৰেঞ্জ ৪৫০ কিলোমিটাৰ। শেহতীয়াকৈ নতুন দিল্লী আৰু মস্কোৱে যৌথ উদ্যোগত ৮০০ কিলোমিটাৰ দৈৰ্ঘ্যৰ ‘ব্ৰহ্মছ মাৰ্ক-২’ৰ বিকাশৰ সন্দৰ্ভত ইতিবাচক আলোচনাত মিলিত হয়।
