মহেশ দীক্ষিত (Mahesh Dixit) চোৰাংচোৱা ব্যুৰো (আই বি) বা কেন্দ্ৰীয় চোৰাংচোৱা সংস্থাৰ শীৰ্ষ পদ গ্ৰহণ কৰিবলৈ ওলাইছে। তপন কুমাৰ ডেকাৰ আই বি সঞ্চালক হিচাপে কাৰ্যকাল ৩০ জুনত শেষ হ’ব। তাৰ পিছত কেন্দ্ৰীয় চোৰাংচোৱা সংস্থাৰ দায়িত্ব মহেশৰ কান্ধত থাকিব।
২০২২ চনত চোৰাংচোৱা ব্যুৰোৰ সঞ্চালক হয় তপন ডেকা। ২০২৪ চনত তেওঁৰ দুবছৰীয়া কাৰ্যকাল শেষ হয়। তাৰ পিছত তেওঁৰ কাৰ্যকাল এবছৰৰ বাবে বৃদ্ধি কৰা হয়। যোৱা বছৰৰ মে’ মাহত তেওঁৰ কাৰ্যকাল আৰু এবছৰৰ বাবে বৃদ্ধি কৰা হৈছিল।
দুবাৰকৈ তেওঁৰ কাৰ্যকাল বৃদ্ধি কৰা হয়। তাৰ পিছত প্ৰশ্ন উত্থাপন হয়, নৰেন্দ্ৰ মোদী চৰকাৰে তৃতীয়বাৰৰ বাবে তেওঁৰ কাৰ্যকাল বৃদ্ধি কৰিব নেকি? অৱশ্যে সেই জল্পনা-কল্পনা দূৰ কৰি কেন্দ্ৰই ঘোষণা কৰে নতুন আই বি মুৰব্বীৰ নাম। ১৯৯৩ চনৰ বেটচৰ আই পি এছ বিষয়া মহেশ দীক্ষিত অন্ধ্ৰপ্ৰদেশৰ কেডাৰ।
বৰ্তমান তেওঁ আই বিৰ বিশেষ সঞ্চালক হিচাপে নিযুক্তি লাভ কৰিছে। এইটো হৈছে কেন্দ্ৰীয় চোৰাংচোৱা সংস্থাৰ দ্বিতীয় সৰ্বোচ্চ পদ। মহেশ দীক্ষিতে বিভিন্ন খণ্ডত গুৰুত্বপূৰ্ণ অভিযানৰ সাক্ষী হৈছে। তেওঁ প্ৰাথমিক জীৱনত এজন চিকিৎসক আছিল। পিছলৈ তেওঁ আই পি এছ বিষয়া হয়। কেৱল সেয়াই নহয়, দেশৰ অন্যতম শীৰ্ষ চোৰাংচোৱা হিচাপেও তেওঁ পৰিচিত হৈ পৰিছিল।
তেওঁৰ জীৱনৰ বহু সময় জম্মু-কাশ্মীৰত কটায়। মহেশ দীক্ষিতে প্ৰায় পাঁচ বছৰ কাশ্মীৰত শ্ৰীনগৰৰ চোৰাংচোৱা ব্যুৰোৰ ‘চাবচিডিয়াৰী ইনটেলিজেন্স ব্যুৰো’ৰ (SIB) মুৰব্বী হিচাপে কাৰ্যনিৰ্বাহ কৰিছে। সন্ত্ৰাসবাদ বিৰোধী ক্ষেত্ৰত তেওঁৰ অভিজ্ঞতা নিঃসন্দেহে বহু গুৰুত্বপূৰ্ণ অভিযানৰ সফলতাৰ আঁৰত আছে।
৩৭০ অনুচ্ছেদ বাতিলৰ পিছত জম্মু-কাশ্মীৰৰ আইন-শৃংখলা বজাই ৰখাত মহেশ দীক্ষিতে গুৰুত্বপূৰ্ণ ভূমিকা পালন কৰিছিল। সংবাদ সংস্থা পিটিআইৰ এক প্ৰতিবেদন অনুসৰি, আঞ্চলিক নিৰাপত্তাৰ প্ৰতি ভাবুকিৰ সৈতে মোকাবিলা কৰাৰ অভিজ্ঞতা তেওঁৰ আছে। মহেশ দীক্ষিতে উত্তৰ-পূব ভাৰত আৰু লাডাখত বিভিন্ন অভিযান চলাইছিল।
