হঠাতে এটা জোকাৰণি উঠিল। ইয়াৰ পিছত এয়াৰ ইণ্ডিয়াৰ বিমানখন (Air India) তললৈ নামিবলৈ ধৰিলে। ভিতৰত থকা একাংশ যাত্ৰী আসনৰ পৰা দূৰলৈ চিটিকি পৰিল। কিছুমানৰ মুখৰ পৰা তেজ ওলাই আহিছিল। বিমানখনৰ যাত্ৰী হিচাপে থকা ইটালীৰ পৰ্যটক (Italian tourist) ভিভিয়ানা (Viviana)ই মাজ আকাশৰ এই ভয়ংকৰ অভিজ্ঞতাটো বৰ্ণনা (Describe the experience) কৰিছে। ঘটনাটো বৰ্ণনা কৰিবলৈ গৈ তেওঁ শিয়ৰি উঠে।
ভিভিয়ানাই কয়, “বাচি আহিছোঁ যে সেয়াই বহুত। এটা সময়ত এনে লাগিছিল যেন মৰিয়েই যাম।” ইটালীৰ যুৱতীগৰাকীয়ে সংবাদ সংস্থাক জনোৱা মতে, বিমানখনত তেওঁৰ মাতৃ আৰু ভগ্নীও তেওঁৰ লগত আছিল। তেওঁৰ মাতৃ আহত হয়। থাইলেণ্ডৰ ফুকেটৰ পৰা ১৩৭ জন যাত্ৰী আৰু ৮ জন ক্ৰু মেম্বাৰ লৈ উৰা মাৰিছিল AI2379 বিমানখন। গন্তব্যস্থান আছিল দিল্লী। কিন্তু যেতিয়া বিমানখন হঠাতে মাজ আকাশত তীব্ৰভাৱে কঁপিবলৈ ধৰিলে, যাত্ৰীসকল আতংকিত হৈ পৰে। বিমানখনৰ ভিতৰত হুলস্থুলীয়া পৰিৱেশৰ সৃষ্টি হয়। হঠাতে হোৱা ‘এয়াৰ টাৰ্বুলেন্স’ৰ (air turbulance) ফলত চাৰিজন ক্ৰুকে ধৰি মুঠ ১৭ জন লোক আহত হয়।
ভিভিয়ানাই কয়, “ফুকেটৰ পৰা উৰামৰাৰ সময়ত কোনো সমস্যা হোৱা নাছিল। কিন্তু কিছু সময় উৰাৰ পিছত হঠাতে বিমানখন জোৰেৰে কঁপিবলৈ ধৰে। মই দেখিলোঁ মোৰ ভগ্নী আসনৰ পৰা ওপৰলৈ উঠি চিটিকি পৰিল।” লগতে মাতৃয়েও মূৰত আঘাত পোৱা বুলি কয়। তেওঁৰ ফোনটো হাতৰ পৰা সৰি পৰিছিল। ঠিক পিছফালে বহি থকা যাত্ৰীগৰাকীৰ মুখৰ পৰা তেজ ওলাই আহিছিল। ভিভিয়ানাৰ ভাষাত, “মই ভাবিছিলোঁ যে মই জীয়াই নাথাকো। মই আগতে কেতিয়াও ইমান ভয়ংকৰ পৰিস্থিতিৰ সন্মুখীন হোৱা নাই। মোৰ হাত-ভৰি থৰথৰ কৰি কঁপি আছিল। মই কান্দিবলৈ ধৰিলোঁ।”
ইফালে এয়াৰ ইণ্ডিয়াই কয় যে এই ঘটনাত কোনো লোক গুৰুতৰভাৱে আহত হোৱা নাই। দুই-এজন যাত্ৰী সামান্য আঘাতপ্ৰাপ্ত হৈছে। কিন্তু আকাশৰ মাজভাগত যাত্ৰীসকলে সন্মুখীন হোৱা ভয়ানক পৰিস্থিতিৰ কথা ভাবিলে এতিয়াও বহুতে স্তম্ভিত হৈ পৰে। বহুতে কয় যে সেইটো আছিল এটা বিভীষিকাময় বিমান যাত্ৰা।
