অৱশেষত জৱাহৰলাল নেহৰু বিশ্ববিদ্যালয়ে (JNU) কমেও ১০ গৰাকী ছাত্ৰীক যৌন নিৰ্যাতন চলোৱাৰ অভিযোগত অধ্যাপক আংগোমচা বিমল আকোইজামক (Angomcha Bimal Akoijam) বৰ্খাস্ত (Terminated) কৰে। শুকুৰবাৰে বিশ্ববিদ্যালয়খনৰ আভ্যন্তৰীণ সমিতিৰ তদন্তৰ অন্তত এই পদক্ষেপ গ্ৰহণ কৰা হৈছে। অভিযুক্ত আকোইজাম জেএনইউৰ স্কুল অব ছ’চিয়েল ছায়েন্সেছৰ অধীনস্থ চেণ্টাৰ ফৰ দ্য ষ্টাডি অব ছ’চিয়েল চিষ্টেমছৰ অধ্যাপক আছিল। একে সময়তে তেওঁ বৰ্তমান মণিপুৰৰ পৰা কংগ্ৰেছৰ লোকসভাৰ সাংসদ।
শুকুৰবাৰে জেএনইউ কৰ্তৃপক্ষই জাৰি কৰা এক নিৰ্দেশত উল্লেখ কৰা হৈছে যে আকোইজামৰ বিৰুদ্ধে উত্থাপিত অভিযোগৰ বিশদ তদন্ত কৰিছে আভ্যন্তৰীণ সমিতিয়ে। তদন্তৰ সময়ত ওলোৱা তথ্যৰ ভিত্তিত সমিতিয়ে প্ৰযোজ্য সেৱাৰ নিয়ম অনুসৰি তেওঁক কঠোৰ শাস্তি প্ৰদানৰ পৰামৰ্শ আগবঢ়ায়। নিৰ্দেশনাটোত স্পষ্টকৈ কোৱা হৈছে, “যথাযথ আইনী প্ৰক্ৰিয়া অনুসৰণ কৰাৰ পিছত, সকলো তথ্য পৰীক্ষা কৰাৰ পিছত, আৰু আভ্যন্তৰীণ সমিতিৰ প্ৰতিবেদনৰ ভিত্তিত অধ্যাপক আংগোমচা বিমল আকোইজামক বিশ্ববিদ্যালয় সেৱাৰ পৰা বৰ্খাস্ত কৰাৰ শাস্তি প্ৰদান কৰা হৈছে।”
ইয়াৰ পূৰ্বে ১১ গৰাকী ছাত্ৰীয়ে অধ্যাপকগৰাকীৰ বিৰুদ্ধে যৌন নিৰ্যাতনৰ অভিযোগ উত্থাপন কৰিছিল। প্ৰায় এমাহ পূৰ্বে বিশ্ববিদ্যালয়ত লিখিত অভিযোগ দাখিল কৰা হৈছিল।
অভিযোগত উল্লেখ কৰা হৈছে যে আকোইজামাই কেম্পাছৰ ভিতৰত থকা নিজৰ বাসগৃহত ছাত্ৰীসকলক বিভিন্ন আড্ডা বা সমাৱেশলৈ মাতিছিল। তাত তেওঁ তেওঁলোকৰ প্ৰতি যৌন ইংগিত দিছিল আৰু অশ্লীল প্ৰস্তাৱ দিছিল। তদুপৰি শ্ৰেণীত তেওঁ অশ্লীল আৰু আপত্তিজনক মন্তব্য কৰা বুলি কেইবাটাও অভিযোগ দাখিল কৰা হৈছে। এই প্ৰাৰম্ভিক অভিযোগ পোহৰলৈ অহাৰ পিছত বিশ্ববিদ্যালয়খনৰ কেইবাগৰাকীও জ্যেষ্ঠ ছাত্ৰীয়েও অধ্যাপকগৰাকীৰ বিৰুদ্ধে একেধৰণৰ অভিযোগ উত্থাপন কৰি কৰ্তৃপক্ষৰ কাষ চাপিছিল, যাৰ ভিত্তিত জেএনইউ কৰ্তৃপক্ষই এই চৰম পদক্ষেপ গ্ৰহণ কৰে।
