যন্তৰ-মন্তৰত (Jantar Mantar) ককৰোচ জনতা পার্টিয়ে (CJP) (চিজেপি) আহ্বান জনোৱা প্রতিবাদী কাৰ্যসূচীৰ পূৰ্বে দিল্লীক কার্যত দুর্গত পৰিণত কৰা হৈছে। শনিবাৰে ৰাষ্ট্ৰীয় ৰাজধানীৰ ৰাস্তাত ৪০ হাজাৰোধিক নিৰাপত্তাৰক্ষী মোতায়েন থাকিব বুলি জানিব পৰা গৈছে। যন্তৰ-মন্তৰ সংলগ্ন অঞ্চলত ইণ্টাৰনেট সেৱা বন্ধ কৰি দিয়া হৈছে। আনকি দিল্লীৰ বিভিন্ন হোটেল, গেষ্ট হাউছ, হোষ্টেলত আৰক্ষীয়ে তালাচী চলাই কিশোৰ-কিশোৰী তথা যুৱক-যুৱতীৰ সন্ধান চলাইছে। যদি কোনোবাই শনিবাৰৰ যন্তৰ-মন্তৰৰ কাৰ্যসূচীত অংশগ্ৰহণ কৰিবলৈ অহা বুলি সন্দেহ হৈছে তেতিয়া সোধা-পোছা কৰা হৈছে।
দেশৰ মুখ্য নির্বাচন আয়ুক্ত জ্ঞানেশ কুমাৰৰ পদত্যাগৰ দাবীত (Demand for Gyanesh Kumar’s resignation) শনিবাৰে ৰাস্তাত নামিব চিজেপি। তাৰ লগতে এছআইআৰ (SIR) প্রত্যাহাৰ আৰু নির্বাচন আয়ুক্তৰ নিয়োগৰ আইন পৰিবর্তনৰ দাবীও জনাইছে। এই দাবীবোৰক লৈ শনিবাৰে ‘যন্তৰ-মন্তৰ ২.০’-ৰ আহ্বান জনোৱা হৈছে। দেশৰ বিভিন্ন প্রান্তৰ পৰা নৱপ্রজন্মই চিজেপিৰ আন্দোলনত অংশগ্ৰহণ কৰিবলৈ আহিছে। ৰাজধানীতে বৃহৎ সমাবেশৰ আশঙ্কা কৰি শুকুৰবাৰে নিশাৰ পৰাই কেন্দ্ৰীয় চৰকাৰে পদক্ষেপ গ্ৰহণ আৰম্ভ কৰিছে। মেট্রো আৰু ৰে’ল সেৱা সীমিত কৰা হৈছে। শনিবাৰে দিনটো বন্ধ থাকিব ৪৫টা মেট্রো ষ্টেচন।
