
ভাৰতীয় পাইলট স্মিথ মাচ্চাৰৰ ওপৰত হোৱা আক্ৰমণ আৰু ফ্লাইডুবাইৰ বিমান অপহৰণৰ চেষ্টাৰ (FlyDubai pilot case) তদন্ত কৰিব বিচাৰিছে নতুন দিল্লীয়েও। ভাৰতৰ ৰাষ্ট্ৰীয় অনুসন্ধান সংস্থাই সংযুক্ত আৰব আমিৰশ্বাহীলৈ পত্ৰ প্ৰেৰণ কৰি বিষয়টোৰ তদন্তৰ অনুমতি বিচাৰিছে। মূল ঘটনাৰ তদন্ত কৰি আছে তেওঁলোকে। তেওঁলোকৰ পৰা কিছুমান নথি-পত্ৰ বিচাৰিছে নিয়াই (NIA)। ফ্লাইডুবাই কাণ্ডত ভাৰতৰ কোনো সম্পৰ্ক আছে নেকি তাৰ তদন্ত চলি আছে।

ডুবাইৰ পৰা টেল আভিভলৈ যোৱা ফ্লাইডুবাই বিমানৰ পাইলটজনক আক্ৰমণ কৰে ওমানৰ সহ-পাইলট হামাম-আল হাম্মামীয়ে। তদন্তকাৰীয়ে জনোৱা মতে, তেওঁ পাইলটজনক হত্যা কৰি ক’ৰবাত বিমানখনৰ সৈতে সংঘৰ্ষৰ পৰিকল্পনা কৰিছিল। মাজ-আকাশত ককপিটত যুঁজিছিল দুয়োজন পাইলটে। ভাৰতীয় পাইলট স্মিথক চোকা অস্ত্ৰৰে প্ৰহাৰ কৰা হৈছিল। কোনোমতে তেওঁ ককপিটৰ দুৱাৰখন খুলিবলৈ সক্ষম হৈছিল। যাত্ৰী আৰু বিমান পৰিচাৰিকাই তেওঁক উদ্ধাৰ কৰে। বিমানখনত আক্ৰমণ কৰা পাইলটজনৰ ভাৰতীয় সংযোগ আছিল নেকি সেই বিষয়ে তদন্ত কৰিব বিচাৰিছে নিয়াই। শুকুৰবাৰে নিয়াৰ সঞ্চালক প্ৰধান ৰাকেশ আগৰৱালাই কয় যে তেওঁলোকে সংযুক্ত আৰব আমিৰশ্বাহীৰ পৰা কিছু নথি-পত্ৰ বিচাৰিছে। তাত থকা দুজনমানকো জেৰা কৰিব বিচাৰে। বৰ্তমান তেওঁলোকৰ উত্তৰৰ অপেক্ষাত আছে। ভাৰতে মিউচুৱেল লিগেল এছিষ্টেন্স ট্ৰিটীৰ (MLAT) অধীনত আমিৰশ্বাহীলৈ পত্ৰ লিখিছে। অপৰাধমূলক কাম-কাজত সহায়ৰ বাবে বিভিন্ন দেশৰ মাজত স্বাক্ষৰিত এই চুক্তি।
তদন্তত প্ৰকাশ পাইছে যে অভিযুক্ত সহ-পাইলটজনে অষ্ট্ৰেলিয়া আৰু ব্ৰিটেইনত অধ্যয়ন কৰিছিল। ভাৰতীয় তদন্তকাৰী সংস্থাটোৱে তদন্ত কৰিব বিচাৰিছে যে তেওঁ তাত কাৰ সংস্পৰ্শলৈ আহিছিল, তেওঁৰ বন্ধুৰ মহলত কোনো ভাৰতীয় আছিল নেকি, কোনো ভাৰতীয়ৰ সৈতে তেওঁৰ কোনো সংস্পৰ্শ আছিল নেকি। যদি ওমানী পাইলটৰ ভাৰতীয় সংযোগৰ প্ৰমাণ পোৱা যায়, তেন্তে ভৱিষ্যতে ভাৰতৰ বাবে কোনো বিপদৰ সম্ভাৱনা আছে নেকি সেয়াও স্পষ্ট হৈ পৰিব। এই পৰ্যায়ত ৰাকেশে আৰু একো ক’ব বিচৰা নাছিল।
ভাৰতীয় পাইলটৰ ওপৰত সংঘটিত আক্ৰমণৰ সন্দৰ্ভত অক্টোবৰ মাহত নিয়াই এফআইআৰ ৰুজু কৰিছিল। অপহৰণকে ধৰি একাধিক ধাৰাত গোচৰ ৰুজু কৰা হৈছে।












