
হায়দৰাবাদত যুৱ কংগ্ৰেছ কৰ্মীয়ে ফেচবুক আৰু ইনষ্টাগ্ৰামৰ নিয়ন্ত্ৰক মেটাৰ কাৰ্যালয় ভাঙি (Meta office attack) লণ্ডভণ্ড কৰে। শুকুৰবাৰে কংগ্ৰেছৰ যুৱ শাখাৰ কেইবাজনো সদস্যই মেটা কাৰ্যালয়ত প্ৰৱেশ কৰি ফুলৰ টাব আৰু অন্যান্য আচবাব ভাঙি পেলায়। তেওঁলোকৰ প্ৰতিবাদৰ বাবে কাৰ্যালয়ৰ কাম কিছু সময়ৰ বাবে স্তব্ধ হৈ পৰে। শেহতীয়াকৈ মেটা কৰ্তৃপক্ষই যুৱ কংগ্ৰেছৰ সৰ্বভাৰতীয় সভাপতি উদয়ভানু শিৱ আৰু সংগঠনটোৰ আন এজন শীৰ্ষ নেতা মনীষ শৰ্মাৰ ইনষ্টাগ্ৰাম একাউণ্টত বাধা-নিষেধ আৰোপ কৰিছিল।

ইয়াৰ বিৰুদ্ধে প্ৰতিবাদকাৰীসকলে প্ৰতিবাদ সাব্যস্ত কৰে। তেলেংগানা প্ৰদেশ যুৱ কংগ্ৰেছৰ সভাপতি জাকিডি শিৱচৰণ ৰেড্ডীৰ নেতৃত্বত এই প্ৰতিবাদ সাব্যস্ত হয়। যুৱ কংগ্ৰেছ কৰ্মীয়ে মেটা আৰু বিজেপিৰ বিৰুদ্ধে শ্লোগান দিয়ে। কেন্দ্ৰৰ বিজেপি চৰকাৰে মেটাৰ দৰে সংগঠনৰ সহায়ত ছ’চিয়েল মিডিয়াত বিৰোধী দলৰ কৰ্মী আৰু সমৰ্থকৰ কণ্ঠৰোধ কৰাৰ অভিযোগ উত্থাপন কৰে প্ৰতিবাদকাৰীসকলে। কংগ্ৰেছৰ নেতা-কৰ্মীৰ যিবোৰ একাউণ্টত নিষেধাজ্ঞা আৰোপ কৰা হৈছে, সেই সকলোবোৰ একাউণ্ট পুনৰ সক্ৰিয় কৰিবলৈ দাবী জনায়।
যুৱ কংগ্ৰেছৰ ফেচবুক পেজৰ এটা পোষ্টত দাবী কৰা হৈছে যে মেটা কৰ্তৃপক্ষই বিজেপিৰ আঙুলিৰ মূৰত নাচিছে। তাত লিখা আছে যে বিৰোধী কৰ্মী আৰু সমৰ্থকৰ একাউণ্ট ‘ব্লক’ কৰি স্বতন্ত্ৰ কণ্ঠ নিস্তব্ধ কৰা হৈছে। মেটাই এইবাৰ ভাৰতৰ সংবিধান মানি চলিব লাগে। বিজেপিৰ নিৰ্দেশ নহয়। পোষ্টটোত সকীয়াই দিয়া হৈছে যে যদি সাত দিনৰ ভিতৰত যুৱ সংগঠনৰ শীৰ্ষ নেতা দুগৰাকীৰ ইনষ্টাগ্ৰাম একাউণ্টত থকা বাধা প্ৰত্যাহাৰ নকৰে, তনেহʼলে মেটাৰ সকলো কাৰ্যালয় বন্ধ হৈ যাব।
হায়দৰাবাদৰ উপৰি মুম্বাইৰ মেটা কাৰ্যালয়ৰ বাহিৰতো মহাৰাষ্ট্ৰৰ যুৱ কংগ্ৰেছৰ নেতৃত্বই প্ৰতিবাদ সাব্যস্ত কৰে। ৰাজ্যখনৰ যুৱ কংগ্ৰেছৰ সভাপতি জিনাত শ্বাব্ৰিনৰ নেতৃত্বত বান্দ্ৰা-কুৰ্লা অঞ্চলৰ মেটা কাৰ্যালয়ৰ বাহিৰত প্ৰতিবাদ সাব্যস্ত কৰে। প্ৰতিবাদকাৰীসকলে কেন্দ্ৰীয় তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱৰ প্ৰতিমূৰ্তি দাহ কৰে। হায়দৰাবাদৰ মেটা কাৰ্যালয়ত প্ৰতিবাদ সাব্যস্ত কৰি তেলেংগানা কংগ্ৰেছ চৰকাৰক আক্ৰমণ কৰিছে ৰাজ্যৰ বিৰোধী দল ভাৰত ৰাষ্ট্ৰ সমিতিয়ে। তেওঁলোকে কয় যে মেটাৰ দৰে সংস্থাৰ কাৰ্যালয়ত আক্ৰমণৰ ফলত ভৱিষ্যতে বিদেশী বিনিয়োগত নেতিবাচক প্ৰভাৱ পৰিব পাৰে।












