ASSAM TIMES POST
নিউজ ডেস্ক:
ক’ৰ’ণা ভাইৰাছত আক্ৰান্ত হৈ মৃত্যু হোৱা লোকৰ সংখ্যাই অভিলেখ গঢ়িছে পৃথিৱীৰ সবাতোকৈ শক্তিশালী ৰাষ্ট্ৰ আমেৰিকা৷ এইখন আমেৰিকাত ক’ৰ’ণাৰ কৱলত পৰি সৃষ্টি হৈছে মৃত্যুৰ মিছিল৷ হটস্পট নিউয়ৰ্ক এতিয়া মৃত্যুপুৰিত পৰিণত হৈছে৷
স্বপ্নৰ চহৰ শিকাগোত মৃত্যুৰ খেলা৷ মৃত্যুৰ কৰাল গ্ৰাসত পৰিছে মাছাচুছেটছ চহৰ৷ মানৱ সভ্যতা আৰু বিজ্ঞানৰ জয়যাত্ৰাক এটা আণুবীক্ষণিক জীৱই থমকাই ৰাখিছে৷ তেনে পৰিস্থিতিতো মনোবল অটুট আছে আমেৰিকাবাসীৰ৷ ক’ৰ’ণাৰ বিৰুদ্ধে সংঘবদ্ধ হৈ থাকি ১৫ পৃষ্ঠা জুৰি মৃত ব্যক্তিৰ নাম প্ৰকাশ কৰি শ্ৰদ্ধাৰ্ঘ্য অৰ্পণ কৰিলে এখন শীৰ্ষ মাৰ্কিন সংবাদ পত্ৰই৷
কাকতখনৰ শেষ পৃষ্ঠাৰ তথ্য মতে আমেৰিকাত ক’ৰ’ণা ভাইৰাছত আক্ৰান্ত হৈ প্ৰায় ৪৫ হাজাৰ মানুহৰ মৃত্যু হৈছে৷ এনে কঠিন সময়ত মাছাচুছেটছ চহৰৰ ক’ৰ’ণাত মৃত্যু হোৱা লোকসকলক অভিনৱ প্ৰথাৰে শ্ৰদ্ধা জনাইছে ‘বষ্টন গ্ল’ব’-এ৷ কাকতখনৰ দেওবাৰৰ বিশেষ সংখ্যাত ১৫ পৃষ্ঠা জুৰি চহৰৰ মৃত লোকসকলৰ নাম ছাপা কৰা হৈছে৷
এই পৰ্যন্ত মাছাচুছেটছ চহৰত ক’ৰ’ণা ভাইৰাছত আক্ৰান্ত হৈছে ৩৮ হাজাৰৰ অধিক মানুহ৷ মৃত্যু হৈছে ১৭০০ জন৷ কেৱল চহৰখনৰ ডৰচেষ্টাৰত মৃত্যু হৈছে ১২০০ জন৷ আজি ‘বষ্টন গ্ল’ব’ৰ এই শ্ৰদ্ধাৰ্ঘ্যই সকলোৰে মন জিনি পেলায়৷ বহুৱে৷টুইট কৰি কাকতখনক প্ৰশংসাৰে উপচাই দিয়ে৷ উল্লেখ্য যে ইয়াৰ আগেয়ে ইটালীৰ এখন কাকতে ক’ৰ’ণাত মৃত্যু হোৱা লোকৰ নাম প্ৰকাশ কৰি শ্ৰদ্ধা জনাইছিল৷ কিন্তু তাত ইমানবোৰ নাম প্ৰকাশ কৰা নাছিল৷
