সোমবাৰে ৰাজ্য আৰু কেন্দ্ৰীয়শাসিত অঞ্চলৰ মুখ্যমন্ত্ৰীৰ সৈতে ভিডিঅ’ কনফাৰেন্স যোগে প্ৰধানমন্ত্ৰীয়ে বৈঠক

ASSAM TIMES POST

নিউজ ডেস্ক:

সোমবাৰে বিয়লি ৩ বজাত সকলো ৰাজ্য আৰু কেন্দ্ৰীয়শাসিত অঞ্চলবোৰৰ মুখ্যমন্ত্ৰীসকলৰ সৈতে ভিডিঅ’ কনফাৰেন্স যোগে প্ৰধানমন্ত্ৰীয়ে বৈঠক আয়োজন কৰিছে৷ ইয়াকে লৈ প্ৰধানমন্ত্ৰীৰ এনেধৰণৰ পঞ্চমখন বৈঠক অনুষ্ঠিত হ’ব৷

দেওবাৰে প্ৰধানমন্ত্ৰীৰ কাৰ্যালয়ৰ সূত্ৰে এই কথা জানিব পৰা গৈছে৷ উল্লেখ্য যে অহা ১৭ মে’ত তৃতীয় পৰ্যায়ৰ লকডাউন শেষ হ’ব৷ তাৰ আগেয়ে মুখ্যমন্ত্ৰীসকলৰ সৈতে আলোচনা কৰা হ’ব৷সূত্ৰটোৰ মতে বেছিভাগ ৰাজ্যই ৰেড, অৰেঞ্জ আৰু গ্ৰীণ জ’ন চিহ্নিতকৰণ বিৰোধিতা কৰিছে৷

কাৰণ প্ৰব্ৰজিত শ্ৰমিকসকলে ৰাজ্যবোৰলৈ ঘুৰি অহাত বহু ঠাইত সংক্ৰমিতৰ সংখ্যা বাঢ়ি যোৱাত ৰেড জ’নৰ আওতাত পৰিছে৷ ৰাজ্য প্ৰশাসনে আপত্তি তুলি কৈছে, এইদৰে বেছিভাগ অঞ্চল ৰেড জ’নত অন্তভূক্ত হ’লে স্বাভাৱিক অৱস্থা ঘুৰাই অনাত সমস্যা হ’ব৷

যিবোৰ এলেকাত কোৱাৰেণ্টাইন চেণ্টাৰ স্থাপন কৰা হৈছে সেইবোৰ ঠাই ৰেড জ’ন কৰিবলৈ ৰাজ্যবোৰে দাবী কৰিছে৷ইয়াৰ আগেয়ে দেওবাৰে পুৱা মন্ত্ৰীসভাৰ সচিব ৰাজীৱ গৌবাই সকলো ৰাজ্য আৰু কেন্দ্ৰীয়শাসিত অঞ্চলৰ মুখ্য সচিব আৰু স্বাস্থ্য সচিবৰ সৈতে একেদৰে ভিডিঅ’ কনফাৰেন্স যোগে বৈঠক কৰিছিল৷