ঘণ্টাত ১৯৫ কিলোমিটাৰ বেগেৰে আহি আছে মহা ঘূৰ্ণিবতাহ ‘আমফান’ : সকলোধৰণৰ সাহায্যৰ আশ্বাস প্ৰধানমন্ত্ৰীৰ

ASSAM TIMES POST

নিউজ ডেক্স

ক’ৰোনা মহামাৰীৰ মাজতে এইবাৰ আহিল ছুপাৰ ছাইক্ল’ন ‘আমফান’৷ বংগোপসাগৰত ক্ৰমশঃ শক্তি বৃদ্ধি পাইছে এই ঘূৰ্ণিবতাহৰ৷ অহা বুধবাৰে পাবহি স্থলভাগ৷ গতিপথ ওড়িশ্যা আৰু পশ্চিম বংগ৷ পূৰ্বৰ ‘ফণী’ বা ‘বুলবুল’তকৈ ভয়ংকৰ এই ছুপাৰ ছাইক্ল’ন বা মহা ঘূৰ্ণিবতাহ৷

২০ মে’ অৰ্থাৎ বুধবাৰে ছুপাৰ ছাইক্ল’ন বা মহা ঘূৰ্ণিবতাহ পাবহি ভূখণ্ড৷ দেওবাৰে ইয়াৰ গতিবেগ আছিল প্ৰতি ঘণ্টাত ৯ কিলোমিটাৰ৷ সোমবাৰে হয়গৈ প্ৰতি ঘণ্টাত ১৩ কিলোমিটাৰ৷ মঙলবাৰে হ’বগৈ প্ৰতি ঘণ্টাত ১০০ কিলোমিটাৰ৷ আনহাতে এই মহা ঘূৰ্ণিবতাহ স্থলভাগ পোৱাৰ পাছত প্ৰতি ঘণ্টাত ১৬৫-১৭৫ কিলোমিটাৰ বেগ হ’ব৷ তাৰ পাছত প্ৰতি ঘণ্টাত ১৯৫ কিলোমিটাৰ হ’বগৈ৷

আনহাতে উপকূলীয় এলেকাত প্ৰৱল বৰষুণ হ’ব৷ মঙলবাৰৰ পৰা ২১ মে’ পৰ্যন্ত মৎস্যজীৱীসকলক সমুদ্ৰলৈ যোৱাত নিষেধাজ্ঞা জাৰি কৰা হৈছে৷ কেতবোৰ ঠাইৰ পৰা বাসিন্দাসকলক স্থানান্তৰিত কৰিবলৈ কোৱা হৈছে৷

ওড়িশ্যা আৰু পশ্চিম বংগ চৰকাৰে সতৰ্কতা জাৰি কৰিছে৷ সাজু কৰা হৈছে দুৰ্যোগ মোকাবিলা বাহিনী৷ পূৰ্বৰ ‘বুলবুল’ৰ অভিজ্ঞতাৰ পৰা শিক্ষা লৈ সকলো ব্যৱস্থা গ্ৰহণ কৰিছে চৰকাৰে৷ সতৰ্ক থাকিবলৈ কোৱা হৈছে উপকূলৰক্ষী বাহিনীক৷ এই পৰিস্থিতি মোকাবিলা কৰিবলৈ প্ৰধানমন্ত্ৰী নৰেন্দ্ৰ মোডীয়ে উচ্চ পৰ্যায়ৰ বৈঠক কৰিছে৷ কেন্দ্রীয় চৰকাৰে ক্ষতিগ্ৰস্ত এলেকাত সকলোধৰণৰ সাহায্য আগবঢ়াব বুলি উল্লেখ কৰিছে৷