ASSAM TIMES POST
নিউজ ডেস্ক:
ক’ৰ পৰা আৰু কি দৰে আহিল ক’ৰোনা ভাইৰাছ৷ মানুহে সৃষ্টি কৰা নেকি এই ভাইৰাছ৷ জিনগতভাৱে ইয়াৰ কিবা পৰিবৰ্তন ঘটোৱা হৈছেনেকি? বিশ্বজুৰি সংক্ৰমণ হোৱাৰ পাছত এনে প্ৰশ্ন বিভিন্ন মহলত উত্থাপন হৈছে৷ আমেৰিকাই বাৰম্বাৰ দাবী কৰি আছে ক’ৰোনা ভাইৰাছ চীনৰ সৃষ্টি৷ কেৱল এয়াই নহয়, ইয়াক লৈ তথ্য গোপন কৰিছে চীনে৷
ইয়াৰ বিপৰীতে বিশ্ব স্বাস্থ্য সংস্থাই এই অভিযোগ নস্যাৎ কৰিছে৷ বিশ্ব স্বাস্থ্য সংস্থাৰ মতে কোনো কাৰণতে মানৱ সৃষ্ট নহয় এই ভাইৰাছ৷ তাৰ মাজতো সকলোৰে সন্দেহ এই ভাইৰাছৰ উৎসলৈ৷ এইবাৰ ক’ৰোনা ভাইৰাছক লৈ নিৰপেক্ষ তদন্ত দাবী কৰিছে অষ্ট্ৰেলিয়া, জাপান, কানাডা, ব্ৰিটেইন, দক্ষিণ কোৰিয়া, ব্ৰাজিল আৰু ভাৰতসহ ৬২খন দেশে৷ ক’ৰোনা ভাইৰাছ ক’ৰ পৰা আহিল তাকে লৈ নিৰপেক্ষ তদন্তৰ যৌথ উদ্যোগ ল’লে অষ্ট্ৰেলিয়া আৰু ইউৰোপীয় ইউনিয়নে৷
আনহাতে ক’ভিড-১৯কলৈ বিশ্ব স্বাস্থ্যসংস্থাৰ প্ৰতিক্ৰিয়াক লৈও নিৰপেক্ষ তদন্তৰ আহ্বান জনোৱা হৈছে৷ ইয়াকে লৈ খচৰা প্ৰস্তাৱ প্ৰস্তুত কৰা হৈছে৷ তাত কোৱা হৈছে ক’ৰোনা ভাইৰাছৰ সংকটকলৈ নিৰপেক্ষ, স্বাধীন আৰু সবিশেষ তদন্ত হোৱাৰ প্ৰয়োজন৷
প্ৰয়োজন সদস্য দেশবোৰৰ সৈতে আলোচনা কৰি বিশ্ব স্বাস্থ্য সংস্থাৰ দিশ স্থিৰ কৰাৰ আহ্বান জনোৱা হৈছে এই প্ৰস্তাৱত৷ কেৱল এয়াই নহয়, এই ভাইৰাছৰ সংক্ৰমণ ৰোধত কিমানটা নিৰপেক্ষ পদক্ষেপ লোৱা হৈছিল তাক লৈও তদন্তৰ প্ৰস্তাৱ দিয়া হৈছে খচৰাত৷
সোমবাৰে ৭৩ সংখ্যক ৱ’ৰ্ল্ড হেল্থ এছেম্বলিৰ বৈঠক অনুষ্ঠিত হয়৷ তাতেই অংশ লয় ভাৰতে৷ প্ৰথমদিনা অষ্ট্ৰেলিয়া আৰু ইউৰোপীয় ইউনিয়ন দেশবোৰে এই বিষয়ে নিৰপেক্ষ তদন্তৰ দাবী কৰি আছিল৷ ইয়াকে বিভিন্ন দেশৰ প্ৰতিক্ৰিয়া আৰু সমৰ্থন গোটোৱাৰ কামত নামিছিল৷ অৱশেষত এটা জোঁটে তদন্তত যোগ দিছে ভাৰতসহ ৬২খন দেশে৷ এই তদন্তৰ খচৰা প্ৰস্তাৱত ভাৰতৰ উপৰি জাপান, ব্ৰিটেইন, নিউজীলেণ্ড, দক্ষিণ কোৰিয়া, ব্ৰাজিল আৰু কানাডাৰ দৰে দেশবোৰে৷
