ASSAM TIMES POST
নিউজ ডেস্ক:
অসমৰ শেহতীয়া বান পৰিস্থিতি অধিক শোচনীয় হৈ পৰিছে। আজিৰ দিনটোত আৰু এজন লোকৰ মৃত্যু হোৱাৰ উপৰি মুঠ ১.৮৯ লাখ লোক বানত আক্ৰান্ত হৈছে। আনহাতে, ৰাজ্যৰ শেহতীয়া বানত মৃত্যু হোৱা লোকৰ সংখ্যা ১৩জনলৈ বৃদ্ধি পালে।
বিগত দুদিন ধৰি হোৱা নেৰানেপেৰা বৰষুণৰ ফলত ন ন অঞ্চল প্লাবিত হৈছে। মুখ্যমন্ত্ৰী সৰ্বানন্দ সোনোৱালে বানাক্ৰান্ত জিলাসমূহৰ প্ৰশাসনক যুদ্ধকালীন তৎপৰতাৰে বানাক্ৰান্তসকলক উদ্ধাৰ আৰু সাহায্য প্ৰদানৰ নিৰ্দেশ দিছে। আনহাতে, এই ক্ষেত্ৰত কোভিড পৰিস্থিতিৰ প্ৰতিও সজাগ হ’বলৈ জনাইছে।
উল্লেখযোগ্য যে বানত অতিকৈ ক্ষতিগ্ৰস্ত হোৱা ধেমাজি জিলাত প্ৰায় ৯১ হাজাৰ লোক বানৰ কবলত পৰিছে। ক্ষতিগ্ৰস্ত আন জিলাসমূহৰ ভিতৰত যোৰহাট, শিৱসাগৰ, মাজুলী আৰু ডিব্ৰুগড় জিলাৰ অৱস্থা অধিক শোচনীয়।ইয়াৰ উপৰি লখিমপুৰ, বিশ্বনাথ, গোলাঘাট আৰু তিনিচুকীয়া জিলাৰ ন ন অঞ্চল বানৰ কবলত পৰিছে।
