ষ্টাফ ৰিপ’ৰ্টাৰ:
ডিফু :কার্বি আংলং জিলা হস্ততাঁত বয়ন শিল্প বিভাগৰ উদ্যোগত যষ্ঠ হস্ততাঁত দিৱস ডিফু আৰবৰেটাম আৰু ক্ৰাফ্ট চেণ্টাৰত অনুষ্ঠিত হৈ যায়। অনুষ্ঠানত মুখ্য অতিথিৰূপে উপস্থিত থাকে কার্বি আংলং স্বায়ত্তশাসিত পৰিষদৰ মুখ্য কার্যবাহী সদস্য তুলিৰাম ৰংহাং। সন্মানীয় অতিথিৰূপে উপস্থিত থাকে সাংসদ হবেণছিং বে। মুখ্য অতিথিৰ ভাষণত ৰংহাঙে কয় যে- দেশৰ প্রথমখন হস্ততাঁত দিৱস ২০১৫ চনত প্রধানমন্ত্রী নৰেন্দ্র মোদীৰ উদ্যোগত চেন্নাইত অনুষ্ঠিত হৈছিল।
দেশৰ বয়ন শিল্পআৰু শিপিনীসকলক সন্মান প্রদর্শনৰ বাবে এই দিৱসৰ আয়োজন কৰা হৈছিল৷ আৰ্থ-সামাজিক বিকাশত এই উদ্যোগৰ যথেষ্ট অৰিহণা আছে বুলিও ৰংহাঙে মন্তব্য কৰে। তেওঁ কয় যে কার্বি আংলং জিলাত হস্ততাঁত আৰু বয়ন শিল্প সংৰক্ষণৰ বাবে প্রতিটো সমষ্টিতে এটাকৈ সমূহীয়া ভৱন স্থাপন কৰা হ’ব। আজিৰ এই অনুষ্ঠানত বহু শিপিনীক সন্মান প্রদান কৰা হয়। এই কার্যসূচীত বিভাগটোৰ কার্যবাহী সদস্য ৰতন টেৰণে সভাপতিত্ব কৰে।
উল্লেখ্য যে হস্ততাঁত খণ্ডটো হ’ল ভাৰতীয় সাংস্কৃতিক ঐতিহ্যৰ এক গুৰুত্বপূৰ্ণ প্ৰতীক। ইয়াৰ উপৰি হস্ততাঁত মন্ত্ৰালয়ৰ মতে ই জীৱন নিৰ্বাহৰ এক গুৰুত্বপূৰ্ণ উতস হিচাপে, বিশেষকৈ নাৰীসকলৰ বাবে, যিসকলৰ ৭০ শতাংশই শিপিনী আৰু ইয়াৰ লগত জড়িত বিভিন্ন খণ্ডত কাম কৰি আহিছে। এই দিৱসটো পালন কৰা হয় হস্ততাঁত সম্প্ৰদায়ৰ সন্মানত আৰু ভাৰতৰ আৰ্থ-সামাজিক বিকাশত তেওঁলোকে আগবঢ়োৱা বৰঙণিৰ স্বীকৃতি হিচাপে। ইয়াৰ উদ্দেশ্য হৈছে এই ঐতিহ্যৰ সংৰক্ষণ আৰু এই খণ্ডৰ কৰ্মীসকলক সবলীকৰণ কৰা।
চলিত বৰ্ষত ছচিয়েল মিডিয়া প্ৰচাৰৰ অংশ হিচাপে মন্ত্ৰালয়ে সকলো কেন্দ্ৰীয় মন্ত্ৰী, লেফটেনেণ্ট গৱৰ্ণৰ, মুখ্যমন্ত্ৰী, সাংসদৰ উপৰি সংশ্লিষ্ট উদ্যোগপতিসকলক দেশৰ হস্ততাঁত বয়ন সম্প্ৰদায়ৰ সংহতিৰ ক্ষেত্ৰত থিয় দিবৰ বাবে তেওঁলোকৰ ছচিয়েল মিডিয়া একাউণ্টৰ জৰিয়তে প্ৰচাৰ চলাবলৈ অনুৰোধ জনায়।
লগতে কেন্দ্ৰীয় চৰকাৰৰ সচিবসকল আৰু সমপৰ্যায়ৰ বিষয়াসকলকো উপস্থাপনৰ বাবে একে ধৰণৰ অনুৰোধ জনায়। অৱশ্যে মন্ত্ৰালয়ে লগতে কয় যে অতিমাৰিৰ বাবে প্ৰদৰ্শনী বা মেলাৰ দৰে পৰম্পৰাগত ইভেণ্টসমূহ অনুষ্ঠিত কৰিব পৰা নাযাব।
কিন্তু শিপিনীসকলে যাতে তেওঁলোকৰ উতপাদিত সামগ্ৰী বিক্ৰীৰ সুবিধা হেৰুৱালগা নহয় তাৰবাবে মন্ত্ৰালয়ে তেওঁলোকক তেওঁলোকৰ উতপাদিত সামগ্ৰী অনলাইন বিক্ৰীৰ সুবিধা প্ৰদান কৰিব। ‘আত্মনিৰ্ভৰ ভাৰত’ পদক্ষেপক ত্বৰান্বিত কৰাৰ পদক্ষেপ হিচাপে, Handloom Export Promotion Council-এ এক ভাৰ্চুৱেল বাণিজ্যৰ আয়োজন কৰিব, য’ত সমগ্ৰ দেশৰ ১৫০তকৈও অধিক শিপিনীয়ে অংশগ্ৰহণ কৰিব।
৭ আগষ্টৰ দিনটো স্বদেশী আন্দোলনৰ স্মৃতি দিৱস হিচাপে উদযাপন কৰা হয়। এই আন্দোলন আৰম্ভ হৈছিল ১৯০৫ চনৰ একেটা তাৰিখত আৰু বৰ্তমান ইয়াক ব্যৱহাৰ কৰা হয় খণ্ডটোৰ গ্ৰহণযোগ্যতা আৰু কৰ্ম-সংস্থাপনৰ সম্ভাৱনীয়তাৰ ক্ষেত্ৰত সজাগতা সৃষ্টিৰ বাবে। উল্লেখ্য যে প্ৰথম হস্ততাঁত দিৱস উদযাপন হৈছিল ২০১৫ চনত প্ৰধানমন্ত্ৰী নৰেন্দ্ৰ মোডীৰ উদ্যোগত চেন্নাইত।
