নিউজ ডেস্কঃ
প্রয়াত বলিউড অভিনেতা সুশান্ত সিং ৰাজপুতৰ দুই বায়েক প্রিয়ঙ্কা আৰু মিতু সিঙে ভয় খাইছে যে যিকোনো সময়ত তেওঁলোকক চিবিআইয়ে গ্রেপ্তাৰ কৰিব পাৰে। সেই কাৰণে বম্বে হাইকোর্টত তেওঁলোকে আবেদন জনাইছে পিটিচনৰ শুনানি সোনকালে আৰম্ভ কৰাৰ বাবে। ন্যায়াধীশ এছএছ সিন্দে আৰু ন্যায়াধীশ এমএছ কর্নিক এই আবেদন কৰাৰ কাৰণ জানিবলৈ বিচৰাত প্রিয়ঙ্কা আৰু মিতুৰ আইনজীৱী মাধৱে থোৰাটে দুয়োৰে তৰফৰ পৰা আদালতক জনায়, যিহেতু তেওঁলোক দুয়ো এই গোচৰত অভিযুক্ত, সেয়ে তেওঁলোক যিকোনো সময়ত গ্রেপ্তাৰ হোৱাৰ ভয় খাইছে।
উল্লেখ্য যে, যোৱা ৭ ছেপ্টেম্বৰত সুশান্তৰ দুই বায়েকৰ বিৰুদ্ধে এফআইআৰ দাখিল কৰে অভিনেত্রী ৰিয়া চক্রৱর্তীয়ে। সেই এফআইআৰ বাতিল কৰাৰ দাবীত পিটিচন জমা দিছে প্রিয়ঙ্কা আৰু মিতুই। ইফালে তেওঁলোকৰ পিটিচন বাতিল কৰাৰ আবেদন জনাইছে ৰিয়াই। অহা ৪ নৱেম্বৰত এই পিটিচনৰ শুনানি হোৱাৰ কথা।
সুশান্তক ‘ভুৱা প্রেছক্রিপচন’ দিয়াৰ অভিযোগ এফআইআৰ কৰিছিল ৰিয়াই। তেওঁৰ দাবী, কেইবাজনো চিকিৎসকৰ সৈতে মিলি ষড়যন্ত্র কৰি এই প্রেছক্রিপচন প্ৰস্তুত কৰা হয়। তেওঁৰ এফআইআৰত দিল্লীৰ চিকিৎসক ডঃ তৰুণ কুমাৰৰো নাম আছে। এজন কার্ডিঅলজিষ্ট হৈ তেওঁ কেনেদৰে এজন অপৰিচিতক এই ধৰণৰ ঔষধ প্রেছক্রাইব কৰিব পাৰে, তাক লৈ প্রশ্ন তুলিছে ৰিয়াই।
