নিউজ ডেক্স:
নতুন বছৰৰ প্রথম দিনাই দেশৰ ছয়খন চহৰক ডাঙৰ উপহাৰ দিলে প্রধানমন্ত্রীয়ে। মধ্যপ্রদেশৰ ইন্দোৰ, গুজৰাট ৰাজকোট, তামিলনাডুৰ চেন্নাই, ঝাৰখণ্ডৰ ৰাচি, ত্রিপুৰাৰ আগৰতলা আৰু উত্তৰ প্রদেশৰ লখনউত একেলগে অত্যাধুনিক লাইট হাউচ প্রকল্পৰ সূচনা কৰিলে নৰেন্দ্র মোদীয়ে। উপস্থিত আছিল সংশ্লিষ্ট ৰাজ্যকেইখনৰ মুখ্যমন্ত্রীসকলো।
প্রধানমন্ত্রী দপ্তৰৰ সূত্ৰ মতে, লাইট হাউচ প্রকল্প, অত্যাধুনিক আন্তর্জাতিক মানৰ প্রযুক্তি, সৰঞ্জাম আৰু পদ্ধতিৰ মাধ্যমেৰে নির্মাণ কামৰ উদাহৰণ হ’বলৈ আগবাঢ়িছে। দেশত এই প্রথম ইমান ডাঙৰ মাপত এই ধৰণৰ প্রকল্প বাস্তবায়িত হ’ব।
ঘৰ নির্মাণৰ ক্ষেত্রত সর্বাঙ্গিনভাবে উদ্ভাবনমূলক প্রযুক্তি গ্রহণ কৰি জিএইচটিচি-ইণ্ডিয়াৰ অধীনত এই প্রকল্পবোৰ বাস্তবায়িত হ’ব। যি ছয়খন চহৰ নিৰ্বাচন কৰা হৈছে, তাৰ প্রত্যেকখনতে উন্নত আন্তঃগাঁঠনিৰ সহায়ত ১০০০টা ঘৰ নির্মাণ কৰা হ’ব।
ঘৰবোৰ নিৰ্মাণ হ’ব মাত্র ১২ মাহৰ ভিতৰত। আৰু এই ঘৰ নিৰ্মাণত তথাকথিত নির্মাণ সামগ্রী ইটা, বালি, চিমেণ্ট ব্যৱহাৰ কৰা নহ’ব। লাইট হাউচ প্রকল্পৰ অধীনত বিকল্প পৰিবেশবান্ধৱ সামগ্রীৰে ঘৰ নির্মাণ কৰা হ’ব। কেন্দ্রৰ দাবী, এই প্রকল্পৰ অধীনত নির্মিত ঘৰবোৰ আর্থিক দিশত কম খৰচী, স্থিতিশীল, উন্নতমানৰ আৰু বহনক্ষম হ’ব।
প্রধানমন্ত্রীৰ দাবী, এই প্রকল্পই এক পাইলট প্রজেক্ট হিচাবে কাম কৰিব। আৰু আগন্তুক দিনত দেশৰ বিভিন্ন প্রান্তত এই অত্যাধুনিক প্রযুক্তি ব্যৱহাৰ কৰি ঘৰ নির্মাণ সম্ভৱ হ’ব।
প্রধানমন্ত্রীয়ে আজি চহৰাঞ্চলৰ বাবে ASHA-INDIA প্রকল্পৰো ঘোষণা কৰে। এই প্রকল্পৰ অধীনত ঘৰ নির্মাণৰ ক্ষেত্রত অত্যাধুনিক প্রযুক্তি ব্যবহাৰকাৰী ষ্টাৰ্টআপসকলক উৎসাহ প্রদান কৰা হ’ব। নৰেন্দ্র মোদীৰ দাবী, বিগত ৬ বছৰত প্রধানমন্ত্রী আবাস যোজনাৰ অধীনত লাখ লাখ ঘৰ নিৰ্মাণ কৰা হৈছে।
প্রধানমন্ত্রীয়ে কয়, ‘হাউছিং ফৰ অল’ লক্ষ্য অর্জনৰ বাবে যি চতুর্মুখী কাম কৰা হৈছে, সেয়া কোটি কোটি দুখীয়া আৰু মধ্যবিত্তৰ উপকাৰত আহিছে। আমাৰ বিশ্বাস ‘হাউছিং ফৰ অল’ৰ স্বপ্ন নিশ্চয় পূৰণ হ’ব।’
