ষ্টাফ ৰিপ’ৰ্টাৰ
অসম বিধানসভাৰ নিৰ্বাচনলৈ মাজত মাথোঁ কেইটামান দিন বাকী৷ শাসক-বিৰোধী সকলো দলেই এতিয়া নিৰ্বাচনৰ বাবে কঁকালত টঙালি বান্ধি সাজু হৈছে৷ অৱশ্যে বিজেপি আৰু কংগ্ৰেছ মিত্ৰজোঁটৰ মাজত এতিয়াও আঁতৰা নাই সমষ্টি ভাগবতৰাৰ আহুকাল৷ তাৰ মাজতে আছে আকৌ প্ৰাৰ্থিত্বকেন্দ্ৰিক সংঘাত ৷
তাৰ মাজতে আগন্তুক নিৰ্বাচনৰ বাবে সাজু হৈছে ৰাজ্যৰ প্ৰধান বিৰোধী দল তথা মহাজোঁটৰ প্ৰধান অংশীদাৰ কংগ্ৰেছ। দলটোৱে বৃহস্পতিবাৰে এক সংবাদমেল সম্বোধন কৰে। সংবাদমেলত কংগ্ৰেছ নেতৃত্বই প্ৰকাশ কৰে যে আগন্তুক নিৰ্বাচনত কংগ্ৰেছ ক্ষমতালৈ আহিলে গ্ৰহণ কৰিব নিবনুৱা সমস্যা সমাধানৰ বাবে বিশেষ পদক্ষেপ। নিবনুৱা সমস্যা সমাধানৰ বাবে গঠন কৰিব পৃথক নিয়োগ মন্ত্ৰালয়। মুখ্যমন্ত্ৰী কাৰ্যালয়তকৈও গুৰুত্বপূৰ্ণ হ’বলগীয়া উক্ত কাৰ্যালয়টোৱে নিয়োগ সংক্ৰান্ত্ৰীয় সকলো কাম-কাজ তদাৰক কৰিব।
এই সন্দৰ্ভত সাংসদ প্ৰদ্যুৎ বৰদলৈয়ে কয়, ‘আমি চৰকাৰীভাবে যি ১ লাখ চাকৰি দিয়াৰ কথা কৈছো সেয়া হৈছে তথ্য ভিত্তিক, বিজেপিৰ দৰে আকাশত চাং পাতি নহয়৷ প্ৰতি বছৰে ১ লাখক ধৰিলে প্ৰতিমাহত ৮,৩০০ জনক আমি সংস্থাপন দিম।’
ৰাজ্যৰ চিকিৎসা ব্যৱস্থা সন্দৰ্ভত প্ৰদ্যুৎ বৰদলৈয়ে কয়, ‘৩.১ কোটি জনসংখ্যাৰ অসমত বিশ্ব স্বাস্থ্য সংস্থাৰ নিয়ম মতে, প্ৰতি এহাজাৰ জনসংখ্যাৰ বিপৰীতে এজন চিকিৎসক লাগে৷ কিন্তু বৰ্তমান অসমত ১,৪৫০ জনৰ বিপৰীতে আছে এজন চিকিৎসক৷ গতিকে আমাক ১৫,০০০ চিকিৎসকৰ লগতে ৪০ হাজাৰ স্বাস্থ্যকৰ্মীৰ প্ৰয়োজন আছে৷’
আনহাতে, ৰাজ্যত ৩৮ হাজাৰ শিক্ষক আৰু ১৫ হাজাৰ আৰক্ষীৰ পদ খালী হৈ থকা বুলিও বৰদলৈয়ে লগতে উল্লেখ কৰে৷
সংবাদ মেলত সাংসদ গৌৰৱ গগৈয়ে কয়, ‘আজিৰ পৰা ডেৰমাহ পিছত অসমত আমাৰ অৰ্থাৎ মহাজোঁটৰ চৰকাৰ হ’ব। কেন্দ্ৰৰ একেখিনি চৰকাৰী আচঁনি আমিও পাম৷ কিন্তু আমাৰ মনোবল সবল৷ আমি সমস্যা সমাধানত গুৰুত্ব দিওঁ৷ বিজেপিয়ে ২৫ লাখ চাকৰি দিম বুলি কৈ মাত্ৰ ৮০ হাজাৰহে দিব পাৰিলে৷ ৰাজ্যত পঞ্জীয়নভুক্ত নিবনুৱা আছে ৩৪ লাখ৷ কিন্তু এক লাখকো চাকৰি দিব নোৱাৰিলে ৷’
