ASSAM TIMES POST
অজন্তা তালুকদাৰ, বোকাখাতঃ ৩৭ নম্বৰ ৰাষ্ট্ৰীয় ঘাইপথে স্পৰ্শ কৰি যোৱা বোকাখাত নগৰ আৰু ইয়াৰ আশে পাশে সঘনে দেখা পোৱা ভয়ংকৰ পথ দুৰ্ঘটনাবোৰে সকৰুণভাৱে উচন কৰি পেলায় একো একোটা পৰিয়াল, একোখন ঘৰ, উদং কৰে পিতৃ মাতৃৰ বুকু। তাৰে ভিতৰত যুৱ বাইকাৰৰ পথ-ষ্টাণ্টও এৰাব নোৱাৰা কাৰণ। ইমানৰ পিছতো শিক্ষা নোলোৱা বাইকাৰৰ ষ্টাণ্ট এতিয়া বোকাখাতত সততে সুলভ এখন সাধাৰণ ছবি।
এয়া সাম্প্ৰতিক সময়ত বোকাখাতে সন্মুখীন হোৱা অন্যতম সামাজিক সমস্যা। এই ক্ৰমবৰ্দ্ধিত দুৰ্ঘটনাবোৰৰ আন এক গুৰুত্বপূৰ্ণ কাৰণ হৈছে অবাধ গতিত নিচাযুক্ত দ্ৰব্যৰ সেৱন। বোকাখাতৰ দৰে সংস্কৃতিৰ উৰ্বৰ ক্ষেত্ৰত সংস্কৃতিৰ সাধনা কৰিবলৈ আগবাঢ়ি অহা যুৱ-প্ৰজন্মৰ একাংশৰ বিপৰীতে মাদক দ্ৰব্যৰ সেৱনে কালৰূপ লৈ ধ্বংস কৰিছে বৃহত্তৰ বোকাখাত অঞ্চলৰ উঠি অহা প্ৰজন্মৰ বহুতকে।
মদ, ভাং আৰু আন নিচাযুক্ত দ্ৰব্যৰ সেৱন কৰি নিজৰ জীৱন আৰু ভৱিষ্যত ধ্বংস কৰা, আনকি বহুতে শোকাৱহ পথ দুৰ্ঘটনাত মৃত্যু পৰ্যন্ত আকোৱালি ল’ব লগীয়া হোৱাৰ লগতে সামাজিক, সাংস্কৃতিক আৰু শৈক্ষিক পৰিবেশো বিনষ্ট কৰি সমাজৰ সাংঘাটিক ক্ষতি কৰিছে উশৃংখল নিচাসক্ত যুৱ চামে।
বোকাখাতৰ আশে পাশে সমাজৰ চকুত ধূলি দি পোখা মেলি উঠা ঘাটি সমূহত সহজে উপলব্ধ মদ আৰু নিচাযুক্ত দ্ৰব্যই যুৱ উশৃংখলতা উদ্বেগজনকভাৱে বৃদ্ধি হোৱাত অধিক অৰিহণা যোগাইছে। অথচ এই ভয়াবহ সমস্যাৰ প্ৰতি দুখজনকভাৱে প্ৰশাসনৰ লগতে আবকাৰী বিভাগে ফলপ্ৰসু পদক্ষেপ গ্ৰহণ কৰাৰ বিপৰীতে উদাসীন হৈ থকাৰ কথাই বোকাখাতৰ বিভিন্ন দল-সংগঠন, অনুষ্ঠান লগতে সচেতন নাগৰিকক উদ্বেগ আৰু দুঃচিন্তাত পেলাইছে। এই ক্ষেত্ৰত সৰব হৈ উঠিছে বোকাখাত আঞ্চলিক ছাত্ৰ সন্থা।
যোৱা ১০ চেপ্তেম্বৰত বোকাখাত আঞ্চলিক ছাত্ৰ সন্থাৰ এটি সঁজাতী দলে বৃহত্তৰ বোকাখাত অঞ্চলত অবাধ গতিত উপলব্ধ মদ, ভাং আৰু গোটখাকে ধৰি বিভিন্ন মাদক দ্ৰব্যৰ অবাধ প্ৰচলন বন্ধ কৰাৰ দাবীত বোকাখাত মহকুমাৰ মহকুমাধিপতিক সাক্ষাৎ কৰি বোকাখাত আঞ্চলিক ছাত্ৰ সন্থাৰ সভাপতি সম্পাদকদ্বয় ক্ৰমে দীপ ঠাকুৰীয়া আৰু সত্যব্ৰত ভূঞা স্বাক্ষৰিত এক স্মাৰক পত্ৰ দাখিল কৰি প্ৰশাসনক এই ক্ষেত্ৰত মৌণ হৈ নাথাকি শীঘ্ৰেই ফলপ্ৰসু ব্যৱস্থা গ্ৰহণ কৰিবলৈ দাবী জনায়।
স্মাৰক পত্ৰত চলিত বৰ্ষত পথ দুৰ্ঘটনাত প্ৰায় ১৫ জন যুৱকে প্ৰাণ হেৰুৱাইছে বুলি উল্লেখ কৰি খেদ প্ৰকাশ কৰা হৈছে যে প্ৰশাসনৰ এটা বিয়াগোম বিভাগ থকা স্বত্তেও আজিলৈ ফলপ্ৰসু ব্যৱস্থা গ্ৰহণ কৰা নহ’ল আৰু উল্লেখ কৰা হৈছে যে বোকাখাতৰ মাজ মজিয়াত সামাজিক সাংস্কৃতিক যিকোনো এটা অনুষ্ঠান হ’লেই অকালতে বহু যুৱকক হেৰুৱাব লগীয়া হোৱাৰ একমাত্ৰ কাৰণ হ’ল নিশাৰ ভাগত চলি থকা মদ আৰু ভাঙৰ অবাধ মুকলি বেহা।
নৈশ ভাগত বোকাখাত নগৰৰ আশে পাশে থকা ধাবা সমূহত মুকলিকৈ মদৰ বেহা চলি আছে কিন্তু এই ক্ষেত্ৰত আবকাৰী বিভাগে ৰহস্যজনকভাৱে মৌনতা অৱলম্বন কৰি আছে। গতিকে এই ক্ষেত্ৰত প্ৰশাসনে বিহীত ব্যৱস্থা গ্ৰহণ নকৰিলে বোকাখাত আঞ্চলিক ছাত্ৰ সন্থাৰ উদ্যোগত মাদক দ্ৰব্যৰ অবাধ প্ৰচলন বন্ধ কৰাৰ দাবীত প্ৰশাসনৰ বিৰুদ্ধে তীব্ৰ আন্দোলন গঢ়ি তোলা হ’ব আৰু ফলস্বৰূপে হ’ব পৰা সম্ভাব্য যিকোনো পৰিস্থিতিৰ বাবে মহকুমা প্ৰশাসন দায়ী হ’ব বুলি ছাত্ৰ সংগঠনটোৰ তৰফৰ পৰা স্মাৰক পত্ৰযোগে মহকুমা প্ৰশাসনক সকিয়াই দিয়া হয়।
আনহাতে বোকাখাতৰ যুৱ প্ৰজন্মক নিচা তথা ধ্বংসৰ গৰাহৰ পৰা মুক্ত কৰি সুন্দৰ সমাজ গঢ়ি তোলাৰ বাবে সজাগ হ’বলৈ বোকাখাত মহকুমা আঞ্চলিক ছাত্ৰ সন্থাৰ সভাপতি দীপজ্যোতি ঠাকুৰীয়া আৰু সম্পাদক সত্যব্ৰত ভূঞাই বোকাখাতৰ ৰাইজলৈ আহ্বান জনাইছে।
