ASSAM TIMES POST
শিৱসাগৰঃ কালিৰেপৰা শিৱসাগৰ জিলাত অৱস্থান কৰি থকা অনুসূচিত জাতি ছাত্ৰ সন্থাৰ কেন্দ্ৰীয় সমিতিৰ সম্পাদক পৰমানন্দ দাস, মুখ্য সাংগঠনিক সম্পাদক দীপাংকৰ দাসে শিৱসাগৰ জিলা অনুসূচিত জাতি ছাত্ৰ সন্থাৰ সভাপতি পৰশ জ্যোতি দাস আৰু সম্পাদক মৃদুল দাসৰ সহিতে জিলা সমিতিৰ বিষয়ববীয়া সকলক লৈ শিৱসাগৰ জিলাৰ অনুসূচিত জাতিৰ গাওঁ সমূহ পৰিদৰ্শন কৰে।
তেওঁ কয় যে দেশে স্বাধীনতা লাভ কৰা ইমান দশকৰ পিছতু অসমৰ অনুসূচিত জাতিৰ গাওঁসমূহ পৰিদৰ্শন কৰিলে দুখ লাগে। চৰকাৰে এই নিৰ্দিষ্ট জাতিটোক কোনো কালে গুৰুত্ব প্ৰদান নকৰে। বৰ্তমানেও শিৱসাগৰত অনুসূচিত জাতিৰ বহুলোক ভূমিহীন হৈ জীয়াই আছে।
বান গড়াখহনীয়ৰ কৱলত অনুসূচিত জাতি ৰাইজৰ অবস্থা শোচনীয় হৈ পৰিছে। এই সহজ-সৰল দুৰ্বল মানুহখিনিক লৈ চৰকাৰে কেৱল ৰাজনৈতিক মুনাফা আদায় কৰিছে। ইয়াৰোপৰি তেওঁ শিৱসাগৰ জিলাস্থিত তেল আৰু প্ৰকৃতিক গেছ নিগমৰ কৰ্তৃপক্ষক সমালোচনা কৰে।
তেল আৰু প্ৰকৃতিক গেছ নিগমে অনুসূচিত জাতি জনজাতি ৰাইজৰ উন্নয়নৰ স্বাৰ্থত লোৱা পদক্ষেপ আভুৱা ভৰাৰ বাহিৰে একো নহয় বুলি মন্তব্য কৰে।
তেওঁ কয় যে অনুসূচিত জাতি ছাত্ৰ সন্থাই ৯ দফীয়া দাবী লৈ এক আন্দোলন গঢ়ি তুলিছে। চৰকাৰে উক্ত দাবীসমূহ গুৰুত্ব প্ৰদান নকৰিলে, অনাগত সময়ত জংগী আন্দোলনৰ মুখামুখি হ’ব লাগিব বুলিও সকীয়নী দিয়ে।
