ASSAM TIMES POST
অজন্তা তালুকদাৰ, বোকাখাতঃ মৌ পালনেৰে কৃষকক স্বাৱলম্বী কৰাৰ লক্ষ্যৰে বোকাখাতৰ মৌপালক সকল আৰু মৌপালনৰ আগ্ৰহী কৃষক সকলক যোৱা ২০ চেপ্তেম্বৰ তাৰিখে প্ৰশিক্ষণ প্ৰদান কৰা হয় ৷ এই উদ্যেশ্যে পুৱতি সাহিত্য সভা ভৱনত প্ৰায় ১০০ জন কৃষকৰ উপস্থিতিত প্ৰশিক্ষণ উদ্বোধন কৰে বোকাখাত মহকুমা কৃষি বিষয়া ৰঞ্জিত কুমাৰ শৰ্মাই, আঁত ধৰে জ্যেষ্ঠ কৃষি উন্নয়ণ বিষয়া অলকানন্দ কাকতিয়ে ৷
বোকাখাত মহকুমাৰ মহকুমাধিপতি বিবেক শ্যামে অনুষ্ঠানত উপস্থিত থাকি কৃষকসকলক উৎসাহ দি নিজৰ ভাষণত কয় যে চৰকাৰে ৰাইজক বিভিন্ন আঁচনিৰে সহায় কৰে, কিন্তু হাতে কামে কৰিব লাগিব কৃষকে, নিজকে স্বাৱলম্বী কৰিব লাগিব কৃষকে আৰু এনে কামৰ বাবে বিজ্ঞানসন্মত প্ৰশিক্ষণৰ প্ৰয়োজন বুলি মহকুমাধিপতি গৰাকীয়ে মত পোষণ কৰে৷
উল্লেখ্য যে কৃষি মন্ত্ৰী অতুল বৰাৰ উদ্যোগত তথা অসম চৰকাৰৰ উদ্যান শস্য বিভাগৰ সহযোগত কৃষকে বোকাখাত মহকুমাত “এপিচ মেলিফেৰা” জাতৰ কলনিসহ ১০০০ টা মৌ বাকচ প্ৰায় ৫০০ কৃষকে লাভ কৰিব ৷ বাকচ আৰু মৌৰ কলনি যোগান ধৰিব অসম চৰকাৰৰ খাদী ব’ৰ্ডে৷ প্ৰশিক্ষক তথা যোৰহাট বাহনাৰ চি কে উদ্যোগৰ স্বত্তাধিকাৰী লীলাচৰণ দত্তই মৌপালক সকলক ব্যৱহাৰিক অভিজ্ঞতাৰে প্ৰশিক্ষণ প্ৰদান কৰে৷
দত্তই প্ৰশিক্ষণত জনায় যে কৃষকে মৌৰ জাত বা প্ৰজাতিবোৰৰ লগত চিনাকি হৈহে পালন কৰিব লাগে, অন্যথা কিছুমান প্ৰজাতিয়ে জীৱ জন্তুক আক্ৰমণ কৰি ঘাটক ৰূপ লব পাৰে৷ পালন কৰা মৌক কেৱল প্ৰাকৃতিক ফুলৰ ৰসৰ ওপৰত নিৰ্ভৰ নকৰি কৃত্ৰিম আহাৰো যোগান ধৰিব লগা হয়।
ফুলযুক্ত সৰিয়হ, গোমধান, ধনীয়া আদিৰ কৃষিপথাৰৰ ওচৰলৈ মৌবাহবোৰৰ স্হান সলনি কৰিব লগা হয় ৷ প্ৰশিক্ষক গৰাকীয়ে লগতে দোহাৰে যে মৌপালনেৰে স্বাৱলম্বী হবলৈ বিজ্ঞানসন্মত পালন পদ্ধতি জনাটো অতীব প্ৰয়োজন, অন্যথা চৰকাৰে বিনামূল্যে মৌবাহ যোগান ধৰিলেও কৃষকে ইয়াৰপৰা ইপ্সিত ফল লাভ কৰিব নোৱাৰিব পাৰে৷
উক্ত প্ৰশিক্ষণত বোকাখাত চিনাকাণৰ মৌপালক পাপুমণি হাজৰিকাই ব্যৱহাৰিক সহযোগিতা আৰু প্ৰশিক্ষণ আগবঢ়ায় ৷ প্ৰশিক্ষণত কৃষি উন্নয়ণ বিষয়া হিমাংগ সোণোৱাল, মৃত্যুঞ্জয় শইকীয়া, কৃষি সম্প্ৰসাৰণ সহায়ক সত্যৰঞ্জন বৰুৱা, উমেশ বৰা আৰু ৰাতুল হাজৰিকা, সমাজকৰ্মী ৰেজাওল হক আৰু ৰেব কাৰ্ডঙে সহযোগিতা আগবঢ়ায়৷
