নিউজ ডেস্কঃ
ভাৰত আৰু নিউজীলেণ্ডৰ মাজত চলি আছে চলিত টেষ্ট শৃংখলাৰ দ্বিতীয় টেষ্ট। উক্ত টেষ্টতে ১৩২ বছৰ পিছত ঘটিল এক ঘটনা৷ দুই টেষ্টৰ কোনো শৃংখলাত চাৰিজন পৃথক অধিনায়কক দেখা গ’ল দ্বিতীয়বাৰৰ বাবে। প্ৰথমবাৰ এই ঘটনা ঘটিছিল ১৮৮৯ চনত।
নিউজীলেণ্ডৰ বিৰুদ্ধে প্রথম টেষ্টত ভাৰতক নেতৃত্ব দিছিল আজিংক্য ৰাহাণেই আৰু নিউজীলেণ্ডৰ অধিনায়ক আছিল কেন উইলিয়ামছন। দ্বিতীয় টেষ্টত আঘাতৰ বাবে দুয়োজনেই খেলা নাই। ভাৰতীয় দলৰ নিয়মীয়া অধিনায়ক কোহলিৰ প্ৰত্যাৱৰ্তন ঘটিছে দ্বিতীয় টেষ্টত। এই টেষ্টত নিউজীলেণ্ডক নেতৃত্ব দিছে টম লাথামে।
১৮৮৯ চনত দক্ষিণ আফ্রিকা ভ্ৰমণলৈ যোৱা ইংলেণ্ড দলক প্রথম টেষ্টত নেতৃত্ব দিছিল আউব্রে স্মিথে। দ্বিতীয় টেষ্টত অসুস্থতাৰ বাবে অধিনায়কত্ব দিয়া হয় মণ্টি বাউডেনক। দক্ষিণ আফ্রিকাক প্রথম টেষ্টত ওৱেন ডানেলে নেতৃত্ব দিয়ে৷ দ্বিতীয় টেষ্টত তেওঁৰ স্থানত অধিনায়ক পতা হয় উইলিয়াম মিল্টনক ৷
