ষ্টাফ ৰিপ’ৰ্টাৰ
ডিফু : সমগ্ৰ ৰাজ্যত হেলমেটৰ বাবে যাতে কোনো দুচকীয়া বাহনৰ আৰোহীৰ মৃত্যু নহয় তাকে সুনিশ্চিত কৰিবলৈ মুখ্যমন্ত্ৰী ডাঃ হিমন্ত বিশ্বশৰ্মাৰ প্ৰত্যক্ষ নিৰ্দেশনাৰ পিছত বিভাগীয় মন্ত্ৰী পৰিমল শুক্লবৈদ্যৰ লগতে বিভাগীয় আয়ুক্ত আৰু সচিবৰ তত্বাৱধনাত ৰাজ্যজুৰি এনে বাহনৰ আৰোহীৰ বিৰুদ্ধে সজাগতামূলক অভিযান অব্যাহত ৰখা হৈছে ৷ একে উদ্দেশ্য আগত ৰাখি কাৰবি আংলং জিলা পৰিবহন বিভাগেও জিলাখনৰ বিভিন্ন প্ৰান্তত হেলমেট বিহীন দুচকীয়া বাহনৰ বিৰুদ্ধে সজাগতামূলক অভিযান অব্যাহত ৰাখিছে ৷ তাৰে অংশ স্বৰূপে আজি মাঞ্জা তিনি আলিত জিলা পৰিবহন বিভাগৰ উদ্যোগত হেলমেটবিহীন চালকৰ বিৰুদ্ধে এক সজাগতামূলক অভিযান চলায় ৷ অভিযানৰ নেতৃত্ব প্ৰদান কৰা জিলা পৰিবহন বিষয়া বিক্ৰমাদিত্য গগৈয়ে সাংবাদিকৰ আগত কয় যে, জিলাখনত হেলমেটবিহীন বাবে চলোৱা দুচকীয়া বাহনৰ আৰোহীৰ দূৰ্ঘটনা দ্বিগুণ বৃদ্ধি পাইছে ৷ এনে দুৰ্ঘটনাৰ পৰা পৰিত্ৰাণ পাবলৈ মুখ্যমন্ত্ৰীৰ নিৰ্দেশ মৰ্মে এনে অভিযান চলোৱা হৈছে ৷
ইয়াৰোপৰি, কুঁৱলী, বনভোজত যোৱা পথত আৰু সাধাৰণ পথত কেনেকৈ বাহনসমূহ চলাব লাগে তাকে সামৰি জিলাখনৰ সাধাৰণ জনতাই বুজি পোৱাকৈ অসমীয়া আৰু কাৰবি ভাষাত সজাগতামূলক পোষ্টাৰ বেনাৰ আদি আঁৰি ৰাইজক সজাগ কৰাৰ পচেষ্টা কৰা হৈছে ৷
ইয়াৰোপৰি বিজ্ঞাপন আৰু মাইক যোগেও এই সন্দৰ্ভত প্ৰচাৰ কৰিব বুলি জানিব দিয়ে পৰিবহন বিষয়া গৰাকীয়ে ৷ মুখ্যমন্ত্ৰীৰ নিৰ্দেশৰ পিছতেই কেৱল হেলমেহেট বিহীন দুচকীয়া চালকৰ বিৰুদ্ধে ছশৰো অধিক গেচৰ পঞ্জীয়নভুক্ত কৰা হৈছে বুলি জানিবলৈ দিয়ে বিষয়াগৰাকীয়ে ৷
