ষ্টাফ ৰিপ’ৰ্টাৰঃ
ডিফু : বোকাজান মহকুমাত নৱ-প্ৰজন্মক ধ্বংসৰ গৰাহলৈ ঠেলি নিয়া বিভিন্ন নিচাযুক্ত সামগ্ৰীৰ সৰবৰাহৰ কাৰ্যকলাপ বৃদ্ধি পাইছে আজি পুৱাৰ ভাগত ডিলাইত এখন যাত্ৰীবাহী বাছৰ পৰা এজন লোকক সন্দেহযুক্ত হেৰ’ইনসহ আটক কৰাৰ পিছতে পুনৰ বোকাজান মহকুমাৰ বৰপথাৰ থানা এলেকাৰ খাকৰাজানত বৃহৎ পৰিমাণৰ গাঞ্জাসহ এটা সৰবৰাহকাৰীক আটক কৰা ঘটনাই তীব্ৰ চাঞ্চল্যৰ সৃষ্টি কৰিছে ৷ ঘটনাৰ বিৱৰণি অনুসৰি এক গোপন সূত্ৰৰ ভিত্তিত বৰপথাৰ থানাৰ O.C. কুলেন্দ্ৰ নাথৰ নেতৃত্বত সহকাৰী উপ-পৰিদৰ্শক বিদ্যা বৰা আৰু সংগীয় ষ্টাফৰ সহযোগত খাকৰাজান নাকা তাললাচী পইণ্টত দিনৰ প্ৰায় ১২-৩০ মান বজাত নাকা তালাচী চলায় ৷
তালাচী কালত ডিমাপুৰৰ পৰা আহি থকা AS 12 AC 3477 পঞ্জীয়ন নম্বৰৰ এখন বাছৰ যাত্ৰীৰূপে আহি থকা এজন লোকৰ পৰা ক’লা ৰঙৰ প্লাষ্টিক বেগত কঢ়িয়াই অনা ৫২ কেজি গাঞ্জা উদ্ধাৰ কৰিবলৈ সক্ষম হয় ৷ এই সন্দৰ্ভত আৰক্ষীয়ে নগাওঁ জিলাৰ হয়বৰ গাওঁৰ কামাল হুছেইনৰ পুত্ৰ আজমল আলী (২৬)ক আটক কৰে ৷ উদ্ধাৰ হোৱা গাঞ্জাখিনি বোকাজান মহকুমা আৰক্ষী বিষয়া জন দাসৰ উপস্থিতিত জব্দ কৰা হয় ৷
