ডিফু:আজি নতুন দিল্লীৰ ৰাষ্ট্ৰপতি ভৱনত ভাৰতৰ ৰাষ্ট্ৰপতি ৰামনাথ কোৱিন্দে ‘বালিমাহী’ৰ কবি ধনেশ্বৰ ইংতি আৰু শকুন্তলা চৌধুৰীক পূৰ্বে ঘোষণা কৰা পদ্মশ্ৰী বঁটাটি আনুষ্ঠানিক ভাবে প্ৰদান কৰে ৷ ভাৰতৰ উপৰাষ্ট্ৰপতি বেংকয়া নাইডু, প্ৰধান মন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ আৰু বিজেপিৰ ৰাষ্ট্ৰীয় সভাপতি আৰু বহুতো গণ্যমান্য ব্যক্তিৰ উপস্থিতিত এই বঁটা প্ৰদান কৰা হয় ৷৷
ভাৰতৰ আন ১০৭ গৰাকী পদ্মশ্ৰী বঁটা প্ৰাপ্ত ব্যক্তিৰ লগতে অসমৰ স্বনাম ধন্য ব্যক্তদ্বয় ধনেশ্বৰ ইংতি আৰু শকুন্তলা চৌধুৰীকো এই বঁটা ৰাষ্ট্ৰপতি ৰামনাথ কোৱিন্দে প্ৰদান কৰে ৷ ধনেশ্বৰ ইংতিক সাহিত্য আৰু শিক্ষাৰ বাবে পদ্মশ্ৰী সন্মানেৰে বিভূষিত কৰা হৈছে বুলি জানিব পৰা গৈছে ৷ অৱশ্যে বঁটা ঘোষণা সময়ত জীৱিত থকা শকুন্তলা চৌধুৰী ইতিমধ্যে পৰকাললৈ গমন কৰিছে ৷
সেয়েহে তেওঁৰহৈ তেওঁৰ সংগঠনৰ লোকে বঁটা গ্ৰহণ কৰে ৷ এই প্ৰতিবেদকৰ ওচৰত এক টেলিফোনিক বাৰ্তাত পদ্মশ্ৰী বঁটা প্ৰাপ্ত বালিমাহী কবি ধনেশ্বৰ ইংতিয়ে বঁটা প্ৰাপ্তৰ পিছত নিজৰ অনুভৱ ব্যক্ত কৰি কয়যে, পৰিৱৰ্তনশীল বৰ্তমান যুগত গাঁৱৰ পৰা আহি এজন সাধাৰণ মানুহ হিচাপে তেওঁ এনে বিৰল সন্মান পাই অত্যন্ত সুখ অনুভৱ কৰিছে ৷ ই সমাজৰ বাবে এক নিদৰ্শন স্বৰূপ ৷
মানুহে মনপুতঃ আৰু অন্তঃকৰণেৰে যিকোনো বিষয়ত কাম কৰিলে এনে বিৰল সন্মান প্ৰাপ্তি কৰিব পাৰে ৷ জীৱনত কিবা এটা পাবৰ বাবে নহয় কিবা এটা কৰি দেখুৱালৈ আৰু কাম কৰাৰ মানসিকতাৰে অগ্ৰসৰ হব লাগে বুলি পদ্মশ্ৰী কবি ধনেশ্বৰ ইংতিয়ে মন্তব্য কৰে
