ডিফুৰ সামাজিক সংগঠন স্বপ্নলোকৰ অষ্টম প্ৰতিষ্ঠা দিৱসৰ লগত সংগতি ৰাখি আজি ডিফু চৰকাৰী উচ্চতৰ মাধ্যমিক বালক বিদ্যালয়ত ছাত্ৰছাত্ৰী সকলৰ মাজত এক প্ৰতিযোগিতাৰ আয়োজন কৰা হয় ৷ ব্যৱহাৰ কৰি মানুহে পেলাই দিয়া বস্তুৰে ছাত্ৰছাত্ৰী সকলক বিভিন্ন সামগ্ৰী তৈয়াৰ কৰিবলৈ দিয়া হৈছিল ৷
ডিফুৰ বিভিন্ন বিদ্যালয়ৰ ৫২ টা দলে এই প্ৰতিযোগিতাত অংশগ্ৰহণ কৰে ৷ কোনোৱে যদি পেলাই দিয়া টায়াৰেৰে চেণ্ডেল , কাপোৰেৰে মেট , বটলেৰে ফুলদানি , কুহিঁয়াৰৰ পেলাই দিয়া বাকলিৰে ঘৰ নিৰ্মাণকে ধৰি ছাত্ৰছাত্ৰী সকলে বিভিন্ন আকৰ্ষণীয় সামগ্ৰী তৈয়াৰ কৰে।
কোষাগাৰ বিষয়া তথা বন সংৰক্ষণ আন্দোলনৰ নেত্ৰী হেমাঞ্জলি সন্দিকৈ , ডিফু চৰকাৰী কলেজৰ অধ্যাপক ড° প্ৰণৱ গগৈ , পদাৰ্থ বিজ্ঞানৰ শিক্ষক ড° প্ৰকাশ বৰ্মন বিচাৰক ৰূপে উপস্থিত থকা প্ৰতিযোগিতা খনিয়ে বৌদ্ধিক মহলৰ সমাদৰ লাভ কৰিছে ৷ উল্লেখ যে স্বপ্নলোকৰ সম্পাদক অন্ধ যুৱতী নিবেদিতাই অনুষ্ঠানটো পৰিচালনা কৰে ৷
বছৰি স্বপ্নলোকে দুখীয়া লোকৰ মাজত গৰম কাপোৰ বিতৰণ কৰাৰ উপৰি গছপুলি ৰোপণ আৰু পৰিবেশ সজাগতাৰ বাবে কাম কৰি আহিছে ৷ নিবেদিতা ঘোষে অতি দৰিদ্ৰ ঘৰৰ ছাত্ৰছাত্ৰী সকলক দৈনিক বিনামূলীয়াকৈ পাঠদান কৰাৰ লগতে দুখীয়া যুৱতীক স্বাৱলম্বী কৰাৰ বাবে স্বপ্নলোকৰ জড়িয়তে কাটিং , নিটিঙৰ প্ৰশিক্ষণ দি আহিছে ৷
২৪ জুলাইৰ সন্ধিয়া ৫ বজাৰ পৰা ডিফু ক্লাৱত স্বপ্নলোকৰ অষ্টম প্ৰতিষ্ঠা দিৱসৰ মুল কাৰ্যসূচী সম্পন্ন হ’ব ৷ য’ত উপায়ুক্ত দিবাকৰ নাথ , পৰিবেশ কৰ্মী মুবিনা আখতাৰে অংশগ্ৰহণ কৰিব ৷ ছাত্ৰছাত্ৰী সকলে নাটকৰ লগতে বিভিন্ন অনুষ্ঠান পৰিবেশন কৰিব ৷
