সোমবাৰে পঞ্চদশ ৰাষ্ট্ৰপতি হিচাপে শপত গ্ৰহণ কৰে নৱনিৰ্বাচিত ৰাষ্ট্ৰপতি দ্ৰৌপদী মুৰ্মুৱে। তদুপৰি দেশৰ প্ৰথম জনজাতীয় মহিলা ৰাষ্ট্ৰপতি হিচাপে নিৰ্বাচিত হৈ তেওঁ এক ইতিহাস ৰচনা কৰে। এটা সময়ত তেওঁ গাঁৱৰ জুপুৰি এটাত দিন পাৰ কৰিছিল যদিও এতিয়া ৩৪০টা কোঠাৰ ৰাষ্ট্ৰপতি ভৱনত থাকিব।
এই ভৱনটোত বৃহৎ বাগিচা, হল আৰু পুথিভঁৰালো আছে। ৰাইচিনা পাহাৰত নিৰ্মিত এই বিলাসী ভৱনটো ব্ৰিটিছ যুগত নিৰ্মাণ কৰা হৈছিল। কিন্তু কেৱল বিলাসী বাসগৃহটোৱেই নহয়, ৰাষ্ট্ৰপতিগৰাকীয়ে যিখন গাড়ীত উঠিব সেয়াও অত্যাধুনিক। আজিৰ ৰাষ্ট্ৰপতিয়ে ব্যৱহাৰ কৰা গাড়ীখনৰ বিষয়ে বিস্তাৰিত তথ্য জনাব বিচৰা হৈছে। প্ৰথম কথা, ৰাষ্ট্ৰপতিৰ গাড়ীখনত নাথাকে নম্বৰ প্লেট। তাৰ ঠাইত আছে অশোক স্তম্ভ, জাতীয় প্ৰতীক।
প্ৰথম অৱস্থাত ভাৰতৰ ৰাষ্ট্ৰপতিৰ আনুষ্ঠানিক ভ্ৰমণৰ বাবে কেডিলাক কান্ট্ৰী গাড়ী ব্যৱহাৰ কৰা হৈছিল। ১৯৫০ চনত সংবিধান প্ৰণয়ন নোহোৱালৈকে ৰাষ্ট্ৰপতিৰ ঠাইত গৱৰ্ণৰ জেনেৰেলৰ কাৰ্যালয় আছিল। সেই সময়ত ৰাষ্ট্ৰপতিৰ বাবে এখন কনভাৰ্টিবল কেডিলাক ব্যৱহাৰ কৰা হৈছিল। ইয়াৰ উপৰি বহু বছৰ ধৰি কনভয়ৰ এটা গুৰুত্বপূৰ্ণ অংশ আছিল। পৰৱৰ্তী সময়ত তাৰ স্থান লয় হিন্দুস্তান মটৰ্ছৰ এম্বেছাডৰে।
৯০ৰ দশকৰ পৰা ভাৰতলৈ বহু নতুন ব্ৰেণ্ডৰ গাড়ী আহিবলৈ আৰম্ভ কৰে। ইয়াৰ উপৰি ৰাষ্ট্ৰপতিগৰাকীয়ে কেইবাখনো বিলাসী গাড়ীও ব্যৱহাৰ কৰিবলৈ আৰম্ভ কৰে। এই ক্ষেত্ৰত শংকৰ দয়াল শৰ্মাৰ হাতত আছিল এখন W124 মাৰ্চিডিজ এছ ক্লাছৰ অফিচিয়েল গাড়ী।
S-Class লিমুজিন মুকলি কৰা প্ৰথম ৰাষ্ট্ৰপতি আছিল শংকৰ দয়াল শৰ্মা। তাৰ পিছত ৰাষ্ট্ৰপতি কে আৰ নাৰায়ণন আৰু এ পি জে আব্দুল কালামে পৰৱৰ্তী প্ৰজন্মৰ বুলেটপ্ৰুফ ডব্লিউ ১৪০ এছ ক্লাছক অফিচিয়েল গাড়ী হিচাপে লাভ কৰিছিল।
ইফালে প্ৰাক্তন ৰাষ্ট্ৰপতি প্ৰতিভা পাটিল আৰু প্ৰণৱ মুখাৰ্জীৰ হাতত আছিল বিলাসী মাৰ্চিডিজ লিমুজিন গাড়ী। প্ৰতিভা পাটিল আছিল দেশৰ প্ৰথমগৰাকী মহিলা ৰাষ্ট্ৰপতি আৰু তেওঁৰ কাৰ্যকালত এখন W221 মাৰ্চিডিজ এছ৬০০ পুলমেন গাৰ্ড লিমুজিন ব্যৱহাৰ কৰা হৈছিল। পিছত প্ৰণৱ মুখাৰ্জীয়েও একেখন গাড়ী পালে। ৰামনাথ কোবিন্দেও ব্যৱহাৰ কৰিছিল।
২০২১ চনৰ স্বাধীনতা দিৱস উপলক্ষে তেওঁৰ নতুন লিমুজিন মাৰ্চিডিজ মেবাক এছ৬০০ পুলমেন গাৰ্ডৰ সৈতে দেখা গʼল ৰাষ্ট্ৰপতি ৰামনাথ কোবিন্দক। ইয়াৰ পূৰ্বে তেওঁ W221 S-Class ৰ ওপৰত ভিত্তি কৰি নিৰ্মিত এখন ভিনটেজ লিমুজিন মাৰ্চিডিজ-বেঞ্জ S500 Pullman Guard ব্যৱহাৰ কৰিছিল।
ভাৰতৰ ৰাষ্ট্ৰপতিগৰাকীৰ লিমুজিনৰ Marcedes Maybach S600 Pullman Guard ৰ দাম প্ৰায় ১০ কোটি টকা। এই লিমুজিনখন অতি বিলাসী গাড়ী। ইয়াৰ উপৰি ইয়াত কেইবাটাও উন্নত বৈশিষ্ট্য আছে। তাত বহি থকাৰ অনুভৱটো যেন এখন বিলাসী চোফাত বহি থকাৰ দৰে।
ভাৰতৰ ৰাষ্ট্ৰপতিগৰাকীৰ গাড়ীখনত আছে বুলেট প্ৰুফ এলয় আৰু টায়াৰৰ লগতে অক্সিজেন যোগান, অটোমেটিক লক কণ্ট্ৰল, পেনিক এলাৰ্ম চিষ্টেম।
ভাৰতৰ ৰাষ্ট্ৰপতিৰ অফিচিয়েল গাড়ীখনৰ আটাইতকৈ আকৰ্ষণীয় বৈশিষ্ট্যটো হʼল ইয়াত VR9 লেভেলৰ বেলিষ্টিক প্ৰটেকচন আছে। লগতে ইয়াত থকা লোকসকলক পইণ্ট ৪৪ কেলিবাৰ হেণ্ডগানৰ গুলীৰ লগতে সামৰিক ৰাইফলৰ গুলী, বোমা আৰু অন্যান্য বিস্ফোৰণৰ লগতে গেছ আক্ৰমণৰ পৰাও ৰক্ষা কৰিব।
