কাশ্মীৰৰ ৰাজৌৰীৰ নৌছেৰা ছেক্টৰত নিয়ন্ত্ৰণ ৰেখাৰ সমীপত বন্দী হোৱা সন্ত্ৰাসবাদী তাবাৰক হুছেইনক ভাৰতীয় সেনাৰ জোৱানে তিনি বটল তেজ দিয়ে। নৌছেৰা ব্ৰিগেডৰ কমাণ্ডাৰ ব্ৰিগেডিয়াৰ ৰাজীৱ নায়াৰে সংবাদ মাধ্যমৰ আগত কয়, “দেওবাৰে সংঘৰ্ষৰ সময়ত উগ্ৰপন্থীজনৰ উৰু আৰু কান্ধ দুটাকৈ গুলীত আঘাতপ্ৰাপ্ত হয়। প্ৰচুৰ পৰিমাণে ৰক্তক্ষৰণো হয়।
তেওঁক অস্ত্ৰোপচাৰৰ বাবে আই চি ইউত ভৰ্তি কৰোৱা হয়, সেনা জোৱানসকলে তেওঁক তিনি বটল তেজ দি তেওঁৰ জীৱন ৰক্ষা কৰে।” বৰ্তমান উগ্ৰপন্থী জনৰ অৱস্থা স্থিতিশীল বুলি তেওঁ জনায়। সেনাৰ এই মানৱীয়তা পোহৰলৈ অহাৰ লগে লগে ভাৰতীয় সেনাই যথেষ্ট প্ৰশংসা লাভ কৰে।
ব্ৰিগেডিয়াৰ কপিল ৰানাই তাবাৰকক বন্দী কৰাৰ সবিশেষ উল্লেখ কৰি কয় যে দেওবাৰে পুৱা নৌছেৰাৰ ঝংগাৰ খণ্ডত নিয়োজিত ভাৰতীয় সৈন্যই দুই-তিনিটা উগ্ৰপন্থীয়ে অনুপ্ৰৱেশ কৰা দেখিবলৈ পায়। ইয়াৰ ভিতৰত তাবাৰকে ভাৰতীয় পোষ্টৰ ওচৰলৈ আহি বেৰ কাটিবলৈ চেষ্টা কৰা দেখা যায়। সেনাক দেখি পলায়ন কৰিবলৈ চেষ্টা কৰাত তাবাৰকক গুলীওৱা হয়, তাৰপিছত তেওঁৰ পিছফালে থকা বাকী উগ্ৰপন্থীসকল পলায়ন কৰে।
কাশ্মীৰৰ এটা স্বাস্থ্য কেন্দ্ৰত বিছনাত পৰি থকা তাবাৰকে ভাৰতত প্ৰৱেশ কৰাৰ সময়ত আহত হোৱা বুলি বুধবাৰে কয়। তাবাৰকে লগতে কয় যে তেওঁৰ সৈতে আন চাৰি-পাঁচজন লোকে ভাৰতত প্ৰৱেশ কৰিবলৈ চেষ্টা কৰিছিল। পাকিস্তান অধিকৃত কাশ্মীৰৰ কোটিৰ ছাবকোট গাঁৱৰ বাসিন্দা বুলি দাবী কৰি তাবাৰকে কয়, “ভাৰতত আত্মঘাতী আক্ৰমণ সংঘটিত কৰিবলৈ মোৰ লগত চাৰি-পাঁচজন লোকক পঠোৱা হৈছিল।
পাক সেনাৰ কৰ্ণেল ইউনাছ চৌধুৰীয়ে আমাক এই কাম দিছিল। ইয়াৰ বাবে আমাক ৩০ হাজাৰ টকাও দিয়া হৈছিল। কিন্তু ভাৰতত প্ৰৱেশ কৰাৰ সময়ত আহত হওঁ।”সেনাৰ সূত্ৰ অনুসৰি, ২০১৬ চনত ভাৰতত অনুপ্ৰৱেশ কৰাৰ সময়ত তাবাৰক আৰু তেওঁৰ ভাতৃ হাৰুণ আলীও ধৰা পৰিছিল।২০১৭ চনত মানৱীয় কাৰণত তেওঁলোকক পাকিস্তানলৈ উভতাই পঠিওৱা হয়।
