ইউটিউবৰ পৰা কʼডিং শিকি মাইক্ৰোছফ্টত চাকৰি পালে ইন্দোৰৰ এজন যুৱকে। এয়াই তেওঁৰ জীৱনৰ প্ৰথম কাম। ২৫ বছৰীয়া যশ ছঙ্কিয়াই আৰম্ভণিতে খেলিছিল। তেওঁ অন্ধ। কিন্তু এই শাৰীৰিক অক্ষমতাইও তেওঁৰ সফলতাৰ বাটত বাধাৰ সৃষ্টি কৰা নাছিল।
তেওঁ অতি সোনকালে মাইক্ৰোছফ্টত চফটৱেৰ ইঞ্জিনিয়াৰ হিচাপে যোগদান কৰিব। তেওঁৰ পূৰ্বৰ কোনো কৰ্ম অভিজ্ঞতা নাই। ২০২১ চনত স্নাতক ডিগ্ৰী লাভ কৰে। তেতিয়াৰ পৰা তেওঁ ঘৰতে বহি আছিল। হাতত কাম নাছিল। সময় নষ্ট নকৰাকৈয়ে তেওঁ ইউটিউবত মনোনিৱেশ কৰিলে।
মনযোগেৰে তাতে কʼডিং শিকিবলৈ ধৰিলে। আৰু আন লʼৰা-ছোৱালীৰ দৰে ইউটিউবৰ পৰা কʼডিং শিকাটো যশৰ বাবে সহজ নাছিল৷ কাৰণ তেওঁ চকুৰে দেখা নাপায়।যশে গ্ৰেজুৱেচনৰ দ্বাৰা নহয়, নিজৰ চেষ্টাত শিকা কʼডিঙৰ দ্বাৰাহে চাকৰিটো লাভ কৰে। এই কʼডিং মাইক্ৰোছফ্টৰ নিৰ্বাচন প্ৰক্ৰিয়াত পৰীক্ষা কৰা হয়।
তিনিটা পৰ্যায়ৰ সাক্ষাৎকাৰ আছিল। সকলো ক্ষেত্ৰতে ইন্দোৰৰ এই যুৱকজন সন্মানসহ পাৰ হৈছে।জানিব পৰা মতে, ইন্দোৰৰ যশ ছঙ্কিয়া আঠ বছৰ বয়সতে গ্লুকোমাত আক্ৰান্ত হৈছিল আৰু দুয়োটা চকুৰ দৃষ্টিশক্তি হেৰুৱাই পেলাইছিল। যশে কয়, “কলেজ পাছ কৰাৰ পিছত মই ইন্টাৰভিউৰ বাবে প্ৰস্তুতি চলাই আছিলো।
কʼডিঙৰ বিষয়ে মই প্ৰায় একো নাজানিছিলো। মাইক্ৰোছফ্টত চাকৰি এটা পাবলৈ মই যথেষ্ট কʼডিং নাজানিছিলো। কেম্পাছ প্লেচমেণ্টৰ জৰিয়তে মই এই চাকৰিটো পোৱা নাছিলো। কলেজ পাছ কৰাৰ পিছত ঘৰতে কʼডিং শিকিলোঁ আৰু অনুশীলন কৰিলোঁ। ইউটিউব চাই সকলো কৰিলোঁ। ডাঙৰ ডাঙৰ কোম্পানীত কাম কৰা বন্ধু-বান্ধৱীৰ পৰাও সহায় পাইছিলোঁ।”
এজন চফটৱেৰ ইঞ্জিনিয়াৰ হিচাপে মাইক্ৰোছফ্টত যশৰ দৰমহা হʼবলৈ গৈ আছে ২০ লাখ টকা। তেওঁ অতিৰিক্ত সুবিধাও লাভ কৰিব। যশে কয় যে তিনিটা কঠিন ৰাউণ্ডৰ সাক্ষাৎকাৰৰ মাজেৰে কেনেকৈ তেওঁ চাকৰিটো পালে। এপ্ৰিল-মে’ মাহৰ ভিতৰত সাক্ষাৎকাৰ গ্ৰহণ কৰা হৈছিল।
৫ ছেপ্টেম্বৰত কামত যোগদান কৰিব যশে। তেওঁলোকৰ কাৰ্যালয় বেঙ্গালুৰুত। তেওঁ আপাতত ইন্দোৰৰ নিজৰ ঘৰৰ পৰাই কাম কৰিব। অফিচৰ পৰা মাতিলে তাত যাব বুলি কʼলে।
