ৰিজাৰ্ভ বেংকৰ সন্মুখত কংগ্ৰেছৰ বিশাল গণ বিক্ষোভ

ASSAM TIMES POST
গুৱাহাটীঃ ভাৰতীয় জনতা পাৰ্টিৰ চৰকাৰৰ আমোলত দেশত ভয়াৱহ অৰ্থনৈতিক মন্দাৱস্থাই দেখা দিয়াৰ অভিযোগৰে বুধবাৰে গুৱাহাটীৰ ভাৰতীয় ৰিজাৰ্ভ বেংকৰ সন্মুখত বিশাল গণ বিক্ষোভ কাৰ্যসূচী ৰূপায়ণ কৰে অসম প্ৰদেশ কংগ্ৰেছ সমিতিয়ে। ইয়াত প্ৰদেশ কংগ্ৰেছৰ তত্বাৱধায়ক তথা নিখিল ভাৰত কংগ্ৰেছ সমিতিৰ সাধাৰণ সম্পাদক হৰিশ ৰাৱট, প্ৰদেশ কংগ্ৰেছৰ সভাপতি ৰিপুণ বৰা, অসম বিধান সভাত কংগ্ৰেছৰ দলপতি দেৱব্ৰত শইকীয়া, প্ৰাক্তন মন্ত্ৰী ৰকিবুল হুছেইন, ভূপেন কুমাৰ বৰা, বিধায়ক ৰেকিবুদ্দিন আহমেদ, নুৰুল হুদা, ৰ’জলিনা তিৰ্কী, মহিলা কংগ্ৰেছৰ সভানেত্ৰী নন্দিতা দাস, অজন্তা নেওগ, অংকিতা দত্ত, মানস বৰাকে ধৰি আন কেইবাজনো নেতা-নেত্ৰীক আৰক্ষীয়ে আটক কৰে। প্ৰতিবাদকাৰীসকলে বেৰিকেড ভাঙি ৰিজাৰ্ভ বেংকৰ প্ৰৱেশদ্বাৰলৈ যাব খোজোতেই আৰক্ষী, নিৰাপত্তা বাহিনীৰ সৈতে প্ৰতিবাদকাৰীসকলৰ হতা-হতিৰ সূত্ৰপাত ঘটে। প্ৰতিবাদকাৰীসকলক ছত্ৰ ভংগ দিয়াবলৈ আৰক্ষী আৰু নিৰাপত্তা বাহিনীয়ে তেওঁলোকৰ ওপৰত লাঠীচালনাও কৰে।